जनकपुरधाम, २० कार्तिक । भारतको बिहार राज्यमा भइरहेको पहिलो चरणको विधानसभाको निर्वाचनलाई लक्षित गर्दै धनुषाको जटही नाका अस्थायी रूपमा बन्द गरिएको छ । बिहीबार बिहान ६ बजेदेखि साँझ ६ बजेसम्मका लागि नाका बन्द गरिएको जिल्ला प्रहरी कार्यालय धनुषाले जनाएको छ ।

भारतीय प्रशासनका अनुसार निर्वाचन अवधिमा अवाञ्छित गतिविधि रोकथाम गर्न तथा सीमा सुरक्षामा कडाइ गर्नका लागि यो व्यवस्था गरिएको हो । सीमा क्षेत्रमा नेपाल र भारत दुवै देशका सुरक्षाकर्मीहरू संयुक्त रूपमा तैनाथ गरिएका छन् ।

जिल्ला प्रहरी कार्यालय धनुषाका प्रहरी नायब उपरीषक गणेशबहादुर बमका अनुसार निर्वाचन अवधिमा शङ्कास्पद गतिविधि रोक्न सघन चेकजाँच र निगरानी बढाइएको छ ।

उनले भने, ‘सीमामा आवतजावत पूर्णरूपमा रोकिएको छ । शंका लागेका व्यक्तिहरूमाथि सोधपुछ हुँदैछ र सुरक्षाकर्मीहरू सर्तक अवस्थामा छन् ।’

नाका बन्द रहेकाले दुबै देशका यात्रु तथा सवारीसाधनको आवागमन पनि स्थगित भएको छ ।

भारतको बिहार विधानसभाको पहिलो चरणअन्तर्गत आज १२१ सिटमा मतदान भइरहेको छ । दोस्रो चरणमा नोभेम्बर ११ का दिन १२२ सिटमा मतदान हुने तय गरिएको छ ।