जनकपुरधाम, १९ कार्तिक । सिरहा र धनुषाको सीमामा पर्ने पवित्र कमला नदीमा कार्तिक पूर्णिमाको अवसरमा बुधबार बिहानैदेखि श्रद्धालुहरूको ठूलो भीड लागेको थियो ।

धार्मिक आस्था र परम्पराको प्रतीकका रूपमा मनाइने यस अवसरमा नेपालका विभिन्न जिल्लासँगै सीमावर्ती भारतबाट समेत भक्तजनहरूको घुइँचो लागेको हो ।

धार्मिक विश्वासअनुसार कार्तिक पूर्णिमाको दिन कमला नदीमा स्नान गर्दा ‘भूत–प्रेत र नकारात्मक ऊर्जा हट्ने’ र शरीर–मन शुद्ध हुने मान्यता रहँदै आएको छ । यही गहिरो आस्था र परम्परागत विश्वासका कारण बिहानदेखि नै श्रद्धालुहरू पवित्र स्नानका लागि नदी किनारमा पुगेका थिए ।

कमला नदीका इनर्वा, ब्यारेज, सिक्रौन, चतरी, बेलहा, बडेर्वा, पटेर्वा, बसबिट्टा र सीमावर्ती भारतको जयनगरसम्म भक्तजनको घुइँचो देखिएको थियो । बिहान सबेरैदेखि नै पुरुष, महिला, बालबालिका, वृद्ध–वृद्धा नदीमा स्नान गर्दै धार्मिक विधि–विधान पूरा गरिरहेका थिए ।

स्नानपछि भक्तजनहरूले दीपदान, तुलसी पूजा, दान–पुण्य तथा व्रतपालन गरेका छन् । स्थानीय युवाहरूले नदी किनारमा व्यवस्था मिलाउने, भीड नियन्त्रण गर्ने र सरसफाइमा सहयोग गरेका छन् ।

उदयपुर, सप्तरी, सिरहा, धनुषा, सर्लाही, महोत्तरी, रौतहटलगायत जिल्लाका साथै भारतको बिहार राज्यको मधुबनी, सीतामढी, दरभंगा क्षेत्रबाट समेत भक्तजनहरू कमला नदीमा स्नानका लागि आएका थिए । बिहान ४ बजेदेखि नै यात्रुहरूको आगमन सुरु भएको र दिउँसोसम्म हजारौंको भीड लागेको स्थानीय प्रहरीको अनुमान छ ।

धनुषाको कमला पुल क्षेत्रमा आएका एक भक्तजन रमेश यादवले भने, ‘प्रत्येक वर्ष हामी परिवारका सबै सदस्यहरूसँग यहाँ स्नान गर्न आउँछौं । यसले मनलाई शान्ति र आत्मिक सन्तुष्टि मिल्छ ।’

स्नानमा सहभागी भक्तजनहरूको भीडलाई लक्षित गर्दै स्थानीय प्रशासन, प्रहरी, स्वास्थ्यकर्मी र स्वयंसेवक परिचालित थिए । सिरहा र धनुषा दुवै तर्फको प्रशासनले संयुक्त रूपमा सुरक्षा योजना कार्यान्वयन गरेको जनाइएको छ ।

कमला नदी ब्यारेज र पुल क्षेत्रमा अस्थायी मेडिकल टिम, स्वच्छ खानेपानी र ट्राफिक व्यवस्थापनका व्यवस्था गरिएको जिल्ला प्रहरी कार्यालयले जनाएको छ ।

स्थानीय निकायहरूले कार्तिक पूर्णिमाको स्नानलाई धार्मिक पर्यटनसँग जोड्ने प्रयास गरिरहेका छन् । जनकपुरधाम, जयनगर र आसपास क्षेत्रका होटेल, पसल र यातायात व्यवसायमा यात्रुहरूको भीडले आर्थिक गतिविधिमा समेत वृद्धि गरेको छ ।

कमला नदीको कार्तिक पूर्णिमा स्नान केवल धार्मिक अनुष्ठान मात्र नभई यो नेपाल–भारतबीचको सांस्कृतिक सम्बन्ध र साझा परम्पराको जिवन्त प्रतीक पनि हो । प्रत्येक वर्षजस्तै यस वर्ष पनि हजारौं भक्तजनको सहभागिताले यो परम्परा अझै बलियो बनाएको छ ।

तस्बिरहरू: अमरेन्द्र कुमार यादव