रौतहट, १८ कार्तिक । रौतहट जिल्लामा तयार भएका करिब ४० हजार राष्ट्रिय परिचयपत्र वितरण नहुँदा जिल्ला प्रशासन कार्यालय गौरमा थन्किएका छन् । प्रशासनले नागरिकलाई आफ्नो परिचयपत्र लिन कार्यालयमा उपस्थित हुन आग्रह गरेको छ ।

सहायक प्रमुख जिल्ला अधिकारी किरणनिधि तिवारीका अनुसार नागरिकका लागि तयार भइसकेका परिचयपत्र कार्यालयमा सुरक्षित छन् । तर, अधिकांश नागरिकले आफ्नो कार्ड लिन आउनु नपरेकाले वितरण प्रक्रिया सुस्त रहेको छ । उनका अनुसार नागरिकले आफ्नो परिचयपत्र तयार भएको वा नभएको जानकारी लिन कार्यालयमा सम्पर्क गर्न सक्ने व्यवस्था गरिएको छ ।

नायब सुब्बा राम नरेश साहले भने, ‘कार्यालयले वितरणका लागि आवश्यक व्यवस्था पूरा गरेको छ । तर, नागरिक स्वयम् उपस्थित नभएकाले हजारौँ कार्डहरू फाँटमै थन्किएका छन् ।’ प्रशासनको अनुमान अनुसार धेरैजसो नागरिकलाई आफ्नो परिचयपत्र तयार भएको जानकारी नै छैन भने कतिपय व्यक्ति रोजगारी, अध्ययन वा अन्य कारणले जिल्ला बाहिर रहँदा लिन आउन सकेका छैनन् ।

हाल राष्ट्रिय परिचयपत्र सरकारी सेवा, बैंकिङ कारोबारदेखि सामाजिक सुरक्षा भुक्तानीसम्म सबै क्षेत्रमा अनिवार्य कागजातको रुपमा प्रयोग भइरहेको छ । नयाँ नागरिकता वितरणसँगै परिचयपत्र अनिवार्य भएपछि नागरिकहरू बनाउने दौडमा देखिन्छन् । तर, बनेपछि लिन बेवास्ता गर्ने प्रवृत्ति बढ्दै गएको छ ।

जिल्ला प्रशासन कार्यालय रौतहटका सूचना अधिकारी मनिष झाले भने, ‘छिट्टै सार्वजनिक सूचना जारी गरी नागरिकलाई जानकारी दिने तयारीमा छौँ । साथै, नगरपालिका, गाउँपालिका र वडा कार्यालयमार्फत पनि सूचना प्रवाह गर्ने योजना बनाइएको छ । यसले सबै नागरिकले आफ्नो परिचयपत्र लिन सहज हुनेछ ।’