बारा, १८ कार्तिक । सरकारले आउँदो फागुन २१ गते प्रतिनिधि सभा निर्वाचन मिति तोकेसँगै बाराको निर्वाचन कार्यालयमा चहलपहल सुरु भएको छ । निर्वाचन तयारीका कामसँगै मतदाता नामावली दर्ता र नयाँ दलहरूको सनाखतका लागि जिल्लाभर गतिविधि तीव्र बनेका छन् ।

निर्वाचन आयोगले अध्यादेशमार्फत असोज १० गतेदेखि मतदाता नामावली सङ्कलन कार्य प्रारम्भ गरेपछि बारामा दर्ता गर्न आउनेहरूको भीड बढेको जिल्ला निर्वाचन कार्यालयले जनाएको छ । विशेषगरी जेनजी पुस्ताका युवाहरू मतदाता नामावली दर्ता गर्न उत्साहित देखिएका छन् ।

जिल्ला निर्वाचन कार्यालय बाराका सूचना अधिकारी मुकेश कुमार सिंहका अनुसार असोज १० गतेदेखि कार्तिक १७ गते सोमबारसम्म ३ हजार ३ सय जना नयाँ मतदाताले आफ्नो नाम दर्ता गराएका छन् । उनले भने, ‘जेनजी आन्दोलनपछि युवाहरू राजनीतिक रूपमा सचेत बनेका छन् । त्यसैले मतदाता नामावली दर्तामा उत्साहजनक सहभागिता देखिएको हो ।’

नेपालको कानुन अनुसार १८ वर्ष उमेर पुगेका र नेपाली नागरिकता प्राप्त गरेका नागरिकहरूले मतदाता नामावलीमा आफ्नो नाम दर्ता गराउन सक्छन् । यस पटक विदेशमा काम वा अध्ययनका कारण अघिल्ला चरणमा नाम दर्ता गर्न नसकेकाहरूका लागि कार्तिक ३० गतेसम्म नाम दर्ताको अवसर खुला गरिएको छ ।

सिंहका अनुसार मतदाता परिचयपत्र हराएका मतदाताले पनि नागरिकता वा अन्य सरकारी परिचयपत्रको आधारमा मतदान गर्न सक्ने व्यवस्था छ । उनले थपे, ‘विगतमा २०७८ को निर्वाचनमा पनि परिचयपत्र नभएका मतदातालाई जग्गाधनी प्रमाण पुर्जाको आधारमा मतदान गर्न दिइएको थियो, यसपटक पनि त्यस्तो वैकल्पिक व्यवस्था कायम रहन्छ ।’

जिल्ला निर्वाचन कार्यालय बाराका प्रमुख नवीन चौधरीले आयोगको निर्देशन अनुसार मतदाता नामावली अद्यावधिक र नयाँ दलहरूको सनाखत कार्य समानान्तर रूपमा भइरहेको बताए । उनका अनुसार असोज ३० गते गतिशील लोकतान्त्रिक पार्टीले आयोगमा दल दर्ता गरेपछि जिल्लास्तरमा त्यसको सनाखत प्रक्रिया सुरु गरिएको छ ।

‘निर्वाचन मिति घोषणा भएपछि आयोगले जुन–जुन निर्देशन दिएको छ, हामी त्यसकै आधारमा जिल्लास्तरका तयारी गर्दैछौं,’ प्रमुख चौधरीले भने, ‘हाल मतदाता नामावली सङ्कलन, नयाँ दलहरूको सनाखत र निर्वाचन सामग्री व्यवस्थापनमा केन्द्रित छौं ।’

उनका अनुसार अहिलेको प्राथमिक कार्य मतदाता दर्ता र जनशक्ति व्यवस्थापन हो । ‘निर्वाचन तोकिएअनुसार समयमै भयो भने सुरक्षा व्यवस्था र व्यवस्थापनबारे छलफल पछि हुनेछ,’ उनले स्पष्ट पारे ।

२०७८ को निर्वाचनमा बारामा कुल ४ लाख ४० हजार ५१५ मतदाता दर्ता भएका थिए । आयोगका अधिकारीहरूले आगामी प्रतिनिधि सभा निर्वाचनमा यस संख्या साढे चार लाखभन्दा माथि पुग्ने सम्भावना रहेको अनुमान गरेका छन् ।

अहिले कार्यालयमा दैनिक रूपमा दर्जनौं युवा नयाँ मतदाता परिचयपत्रका लागि लाइनमा उभिइरहेका छन् । निर्वाचन कार्यालयले मतदाता शिक्षा र जनचेतनामूलक कार्यक्रम पनि सँगसँगै सञ्चालन गरिरहेको छ ।