जनकपुरधाम, १८ कार्तिक । धनतेरशको पूर्वसन्ध्यामा सुनचाँदी पसलमा प्रहरीले गरेको छापा कारवाहीप्रति आपत्ति जनाउँदै सुरु भएको व्यवसायीहरूको आन्दोलन जनकपुरधाममा चार बुँदे सहमतिसँगै स्थगित भएको छ ।

मंगलबार साँझ जनकपुरधाम उद्योग वाणिज्य संघ र जिल्ला प्रशासन कार्यालय धनुषाबीच भएको छलफलमा दुवै पक्ष सहमतिमा पुगेका हुन् ।

सहमति अनुसार सुनचाँदी पसलमा छापा मार्ने घटनाको विषयमा सम्बन्धित निकायले छानबिन गर्ने र दोषी ठहरिने प्रहरीमाथि कानुनअनुसार कारबाही अघि बढाइने उल्लेख गरिएको छ । सोसँगै आन्दोलनरत व्यवसायीहरूले तत्कालदेखि सबै आन्दोलन कार्यक्रम स्थगित गर्ने सहमति पनि भएको जिल्ला प्रशासन कार्यालयले जनाएको छ ।

गत असोज ३१ गते भएको घटनामा प्रहरी र व्यवसायीबीच झडप हुँदा उद्योग वाणिज्य संघका अध्यक्ष सुरेन्द्र भण्डारीसहित केही व्यवसायी घाइते भएका थिए । उक्त दिन जनकपुरधामका सुनचाँदी पसलमा प्रहरीले ‘अवैध कारोबार’ को आरोप लगाउँदै छापा मारेको थियो । सो घटनाले व्यवसायीहरू आक्रोशित बनेका थिए ।

संघले त्यसपछि छापाको नेतृत्व गरेका डिएसपी गणेशबहादुर बम र घुमुवा सहायक निरीक्षक मनोजकुमार यादवलगायतलाई कारबाही गर्न माग गर्दै जिल्ला प्रशासन कार्यालय र मधेश प्रदेश प्रहरी कार्यालयमा चार बुँदे ज्ञापनपत्र बुझाएको थियो । तर, प्रशासनले तत्काल कारबाही नगरेपछि व्यवसायीहरूले आन्दोलनका कार्यक्रम घोषणा गरेका थिए ।

आन्दोलनका क्रममा जनकपुरधामको सम्पूर्ण बजार आज दिउँसो १२ बजेसम्म बन्द गरिएको थियो । बजार बन्दका कारण स्थानीय व्यवसायिक गतिविधि र व्यापार ठप्प भएको थियो भने उपभोक्ताहरूलाई समेत असुविधा भएको थियो ।

मंगलबार साँझको छलफलपछि प्रशासन र व्यवसायीबीच सहमति जुटेपछि आन्दोलनको अन्त्य भएको संघले जनाएको छ । संघका अध्यक्ष सुरेन्द्र भण्डारीले भने, ‘हामीले वार्तामार्फत समाधान खोजेका थियौं । अब सरकारले निष्पक्ष छानबिन र दोषीमाथि कानुनी कारबाही गर्नुपर्छ ।’

स्थानीय प्रशासनका अधिकारीहरूले पनि सहमति कार्यान्वयन हुने र घटनाको निष्पक्ष छानबिनका लागि पहल गरिने प्रतिबद्धता जनाएका छन् ।

सहमतिसँगै जनकपुरधामको बजार बुधबारदेखि पुनः नियमित रूपमा सञ्चालनमा आउने छ ।