रौतहट, १७ कार्तिक । आम जनता पार्टी (आजपा)ले हालैको बाढी र अविरल वर्षाबाट प्रभावित किसान र सर्वसाधारणलाई राहत तथा मुआब्जा उपलब्ध गराउन प्रधानमन्त्री सुशीला कार्की नेतृत्वको सरकारसँग माग गरेको छ ।

आजपा रौतहट क्षेत्र नं. १ क्षेत्रीय समितिले सोमबार जिल्ला प्रशासन कार्यालयमार्फत प्रधानमन्त्री तथा मन्त्रिपरिषद् कार्यालयलाई ज्ञापनपत्र बुझाउँदै बाढीपीडितहरूलाई न्याय र किसानहरूलाई राहत तथा मुआब्जा तत्काल उपलब्ध गराउन आग्रह गरेको हो ।

सहायक प्रमुख जिल्ला अधिकारी किरणनिधि तिवारीलाई बुझाइएको ज्ञापनपत्रमा आजपाले बाढीपीडितहरूलाई राहत नदिए आन्दोलनका कार्यक्रम घोषणा गर्ने चेतावनीसमेत दिएको छ ।

आजपानिकट आम उद्योग वाणिज्य संघका केन्द्रीय अध्यक्ष तथा आजपा नेता साजन जयसवालको नेतृत्वमा गएको टोलीले किसान र सर्वसाधारणका समस्यामा ढिलासुस्ती भएको भन्दै सरकारको ध्यानाकर्षण गराएको हो ।

जयसवालले भने, ‘रौतहटका धेरै गाउँ डुबानमा परेका छन् । किसानका खेतबारी, बाली, घर र पशु नष्ट भएका छन् । बाढीपीडितहरू अस्थायी टहरामा खाद्यान्न, लत्ताकपडा र औषधीको अभावमा कष्टकर जीवन बिताइरहेका छन् । सरकारबाट न्याय र राहत पाउनु उनीहरूको अधिकार हो ।’

ज्ञापनपत्रमार्फत आजपाले दीर्घकालीन समाधानका लागि नदी तटबन्ध मर्मत, जलनिकास प्रणाली सुधार र जोखिमयुक्त बस्तीका लागि पुनस्र्थापनाको व्यवस्था गर्न पनि माग गरेको छ ।

रौतहट जिल्ला प्रशासन कार्यालय गौरमा ज्ञापनपत्र बुझाउन पुगेका नेताहरूमा आजपा सचिवालय सदस्य रामशरण यादव, अमित साह, श्रीभगवान पटेल, अनिल झा, जयलाल महतो, दिनेश सहनी, कार्तिक जयसवाल, राजेश साह र महेश यादव लगायत सहभागी थिए ।

आजपाले ज्ञापनपत्रमार्फत किसान र बाढीपीडितका मुद्दालाई प्राथमिकतामा राख्न सरकारलाई आग्रह गरेको छ ।