लागुऔषधसहित चार जना पक्राउ

सिरहा, १७ कार्तिक । सिरहाका विभिन्न स्थानबाट लागुऔषधसहित चार जना पक्राउ परेका छन् ।
प्रहरीले लहान र कर्जन्हा क्षेत्रमा पछिल्ला दिनमा भइरहेको लागुऔषध सेवन तथा बिक्री वितरण नियन्त्रण गर्न चलाएको विशेष अभियानका क्रममा उनीहरूलाई नियन्त्रणमा लिएको हो ।
इलाका प्रहरी कार्यालय लहानबाट खटिएको टोलीले लहान नगरपालिका–११ पडरिया टोलमा गरेको छापामारीमा २३ वर्षीय सुजित चौधरीलाई पक्राउ गरेको हो ।
चौधरीको घर कोठामा खानतलासी गर्दा सानो प्लास्टिक डब्बामा कालो रंगको प्लास्टिकमा बेरेर राखिएको ३.७० ग्राम लागुऔषध ‘ब्राउन सुगर’ जस्तो देखिने पदार्थ, डिजिटल तराजु र खुर्पा बरामद गरिएको प्रहरीले जनाएको छ । प्रहरीका अनुसार उनी लामो समयदेखि लागुऔषध सेवन र बिक्रीमा संलग्न रहेको प्रारम्भिक अनुसन्धानले देखाएको छ ।
यस्तै, सिरहाको कर्जन्हा नगरपालिका–४ भुलके चौकबाट मकवानपुरगढी–४ का २७ वर्षीय रविन कुमार तिमल्सिनालाई १८ पिस नाइट्राजेपाम ट्याब्लेटसहित पक्राउ गरिएको छ । इलाका प्रहरी कार्यालय बन्दीपुरबाट गस्तीमा खटिएको टोलीले करजन्हाबाट बन्दीपुरतर्फ पैदल यात्रामा रहेका तिमल्सिनालाई शंका लागेपछि चेकजाँच गर्दा कालो झोलाभित्र लागुऔषध भेटिएको बताएको छ ।
यसैगरी, लहान नगरपालिका–१ पडरिया टोलका २६ वर्षीय योगेश्वर चौधरीलाई लागुऔषध ‘ब्राउन सुगर’ जस्तो देखिने सेतो पाउडर ६.५० ग्रामसहित नियन्त्रणमा लिइएको छ । गोप्य सूचनाका आधारमा खटिएको प्रहरी टोलीले उनको घर र शरीर खानतलासी गर्दा सो पदार्थ बरामद गरेको हो ।
त्यस्तै, लहान नगरपालिका–११ पडरिया टोलकै ४३ वर्षीय मनोज चौधरी पनि लागुऔषध खैरो हिरोइनजस्तो देखिने पदार्थ ०.२० मिलिग्रामसहित आइतबार बेलुका पक्राउ परेका छन् ।
प्रहरीका अनुसार पक्राउ परेकाहरू सबैलाई प्रारम्भिक अनुसन्धानपछि लागुऔषध नियन्त्रण ऐन २०३३ बमोजिम आवश्यक कानूनी कारबाहीका लागि जिल्ला प्रहरी कार्यालय सिरहा पठाइएको छ ।

