रौतहट, १७ कार्तिक । रौतहटको माधवनारायण नगरपालिकाका निमित्त प्रमुख प्रशासकीय अधिकृत इन्जिनियर नागेन्द्र राय यादवमाथि नगरपालिकालाई आर्थिक नोक्सानी पुर्याउँदै व्यापक भ्रष्टाचार र अनियमितता गरेको आरोप लगाइएको छ । सो आरोपसहित अख्तियार दुरुपयोग अनुसन्धान आयोगमा लिखित उजुरी परेको छ ।

काठमाडौँस्थित आयोगको कार्यालयमा दर्ता गरिएको उजुरीमा माधवनारायण नगरपालिकाका मेयर बैजनाथ प्रसाद यादव र निमित्त प्रमुख प्रशासकीय अधिकृत यादव मिलेमतोमा बजेट रकम दुरुपयोग गरी कामै नगरी फर्जी बिल–भर्पाइ बनाएको, अस्वभाविक खर्च गरी सरकारी सम्पत्तिमा हिनामिना गरेको र नगरपालिकालाई आर्थिक रूपमा क्षति पुर्याएको उल्लेख गरिएको छ । उजुरीकर्ताले भ्रष्टाचार निवारण ऐनबमोजिम दुवै जनामाथि छानबिन र कानूनी कारबाहीको माग गरेका छन् ।

२०७८/७९ मा मेयरमा निर्वाचित भएका बैजनाथ यादवले आफूअनुकूलका प्रमुख प्रशासकीय अधिकृत ल्याएर कार्यसञ्चालन गर्ने गरेको, असहयोग गर्ने अधिकृतलाई सरुवा गराएर अर्काे ल्याउने गरेको तथा अनियमितता लुकाउन कतिपयलाई हाजिर नै हुन नदिने गरेको आरोप उजुरीपत्रमा उल्लेख छ ।

माधवनारायण–३ का स्थानीय बासिन्दा आशितोषकुमार यादवले दर्ता गराएको उजुरीपत्रमा मेयर यादवले आफ्ना नातामा ससुरा पर्ने इन्जिनियर नागेन्द्रलाई निमित्त प्रमुख प्रशासकीय अधिकृत बनाएर नगरपालिकामा ल्याएको र उनीहरू मिलेर ठूला आर्थिक अनियमितता गरेका दाबी गरिएको छ ।

आयोगको टंगालस्थित कार्यालयमा ‘सि–०२१२३४’ नम्बरमा दर्ता गरिएको उजुरीमा १२ बुँदे गम्भीर आरोप समावेश छन् । उजुरी अनुसार मेयर र निमित्त प्रमुख प्रशासकीय अधिकृत यादवले गोप्य रूपमा प्रशासकीय भवनको टेन्डर मिलेमतोमा हेरफेर गरी मनपरी ठेक्का दिएको, २० प्रतिशत कमिसन लिएर मात्र उपभोक्ता समितिलाई भुक्तानी दिने गरेको, विकास योजनालाई बढी कमिसनका लागि टुक्र्याएर विभिन्न संघसंस्थामार्फत कोटेसन प्रक्रिया अपनाएको आरोप लगाइएको छ ।

त्यसैगरी, संघ र प्रदेश सरकारबाट प्राप्त सशर्त अनुदानको रकम फर्जी बिल बनाएर भुक्तानी गरिएको, सडक बत्ती सस्तो दरमा खरिद गरी १० गुणा बढी मूल्यमा भुक्तानी गरिएको, सवारी साधन र इन्धन दुरुपयोग गर्दै नगरपालिकाको बजेटबाट निजी स्वार्थ पूर्ति गरिएको उजुरीमा उल्लेख छ ।

उजुरीकर्ताले आर्थिक सहायताको नाममा नगरपालिकाका पदाधिकारी स्वयं होटलबाजी गर्ने गरेको र सामाजिक सुरक्षा भत्ता वितरण प्रणालीमा समेत अनियमितता बढ्दै गएको आरोपसमेत लगाएका छन् ।

उजुरीकर्ताले निमित्त प्रमुख प्रशासकीय अधिकृत नागेन्द्र राय यादवले विभिन्न उपभोक्ता समितिका पदाधिकारीसँग कमिसन माग्दै गरेको अडियो संवाद पनि अख्तियारमा पेस गरेको दाबी गरेका छन् ।

स्थानीयवासीहरूका अनुसार पछिल्ला वर्षहरूमा माधवनारायण नगरपालिकामा योजनाको कार्यान्वयनभन्दा बढी रकम खर्च देखाउने र अनावश्यक भुक्तानीका घटना बढेका छन् । नगरपालिकाको बजेट उपयोगमा पारदर्शिता र जवाफदेहिताको अभावले जनताबीच असन्तुष्टि बढ्दै गएको छ ।