काठमाडौं, १६ कार्तिक । मधेश प्रदेशका मुख्यमन्त्री जितेन्द्रप्रसाद सोनारले प्रदेशका उद्योगहरूको विद्युत् आपूर्ति तत्काल पुनःसञ्चालन गर्न प्रधानमन्त्री सुशीला कार्कीको ध्यानाकर्षण गराएका छन् ।

आइतबार बालुवाटारस्थित प्रधानमन्त्रीको सरकारी निवासमा भएको भेटवार्तामा मुख्यमन्त्री सोनारले विद्युत् लाइन काटिँदा प्रदेशका सयौं उद्योग ठप्प हुन पुगेको र हजारौं युवाको रोजगारी संकटमा परेको बताए ।

प्रधानमन्त्रीसँगको भेटपछि सञ्चारकर्मीहरूसँग कुरा गर्दै मुख्यमन्त्री सोनारले संघीय सरकारको निर्णयले प्रदेशको उत्पादनमूलक क्षेत्र प्रभावित भएको टिप्पणी गरे । उनले भने, ‘डेडिकेटेड लाइनको नाममा विद्युत् आपूर्ति रोकिनु प्रदेशको औद्योगिक वातावरणका लागि घातक छ । यसले प्रदेशको आर्थिक गतिशीलता र रोजगारी दुवैमा प्रतिकूल असर पारेको छ ।’

मुख्यमन्त्री सोनारका अनुसार विद्युत् आपूर्ति अवरुद्ध हुँदा उद्योगहरूमा लगानी जोखिममा परेको छ र बेरोजगार युवाहरूको संख्या बढ्दै गएको छ । उनले संघीय सरकारलाई तत्काल कदम चाल्न आग्रह गर्दै भने, ‘हजारौं युवाको रोजगारी उद्योगसँग जोडिएको छ । विद्युत् आपूर्ति अवरुद्ध हुँदा उनीहरू बेरोजगार हुने अवस्था सिर्जना भएको छ । यो समस्या तत्काल समाधान हुनुपर्छ ।’

भेटवार्ताका क्रममा संघीय सरकारले प्रदेश सरकारलाई दिने अनुदान र औद्योगिक पूर्वाधार सुदृढीकरणका विषयमा पनि कुराकानी भएको मुख्यमन्त्री सोनारले जानकारी दिए ।

उनका अनुसार प्रदेशको आर्थिक वृद्धि सुनिश्चित गर्न संघीय र प्रदेश सरकारबीच सहकार्य अझै बलियो बनाइनुपर्ने आवश्यकता रहेको छ ।