जनकपुरधाम, १५ कार्तिक । जनकपुरधाम किराना व्यवसाय संघले जनकपुरधाम उद्योग वाणिज्य संघले घोषणा गरेको आन्दोलनमा समर्थन जनाएको छ ।

सुनचाँदी बजारमा प्रहरीद्वारा गरिएको दमन तथा व्यवसायीमाथि कुटपिट र लाठीचार्जको घटनाप्रति घोर भत्र्सना व्यक्त गर्दै जनकपुरधाम उद्योग वाणिज्य संघले घोषणा गरेको आन्दोलनमा पूर्ण समर्थन जनाएको हो ।

व्यवसायी संघले १७ कार्तिकसम्म तीन दिनसम्म आफ्ना पसलमा कालो झण्डा र कालो पट्टी लगाएर व्यवसाय संचालन गर्ने कार्यक्रम सार्वजनिक गरेको छ ।

त्यसैगरी, १६ कार्तिकका दिन बिहान ९ बजे उद्योग वाणिज्य संघमा भेला भई नगर परिक्रमा गरी जनकचोकमा कोणसभा र पत्रकार सम्मेलन गर्ने कार्यक्रम तय गरिएको छ ।

किराना व्यवसाय संघका महासचिव दिपक गुप्ताका अनुसार उक्त आन्दोलनमा संघका सबै सदस्य र संघसँग आबद्ध व्यवसायीहरू सहभागी भई एकता प्रदर्शन गर्नेछन् ।

संघका अध्यक्ष विकास चौधरीले घटनाप्रति विरोध जनाउँदै व्यवसायीहरूको सुरक्षा र सम्मान सुनिश्चित गर्न तत्काल कदम चालिनुपर्ने बताएका छन् ।