सप्तरी, १५ कार्तिक । सप्तरीको बोदेबर्साईन नगरपालिका–२ बैरियामा शनिबार करेन्ट लागेर एक महिलाको ज्यान गएको छ भने दुईजना घाइते भएका छन् ।

लुगा सुकाउने क्रममा फलामको तारमा करेन्ट प्रवाह हुँदा २८ वर्षीया मालतीदेवी साहको मृत्यु भएको जिल्ला प्रहरी कार्यालय सप्तरीका प्रहरी नायब उपरीक्षक डम्बरबहादुर पुरीले जानकारी दिए ।

करेन्ट लागेर गम्भीर घाइते भएकी साहलाई उपचारका लागि तत्कालै छिन्नमस्ता अस्पताल राजविराज पुर्याइए पनि चिकित्सकले मृत घोषणा गरेका थिए ।

मालतीलाई बचाउने क्रममा करेन्ट लागेको उनका सासू ५० वर्षीया सीतादेवी साह र छिमेकी ६० वर्षीया रामपृत साह घाइते भएका छन् । उनीहरू अहिले सोही अस्पतालमा उपचाररत छन् ।

प्रहरीका अनुसार स्थानीय मोहन साहको घरमा रहेको विद्युत बोर्डबाट लुगा सुकाउने फलामको तारमा करेन्ट प्रवाह भएको प्रारम्भिक अनुसन्धानमा खुलेको छ । घटनाबारे थप अनुसन्धान भइरहेको जिल्ला प्रहरी कार्यालय सप्तरीले जनाएको छ ।