सर्लाही, १५ कार्तिक । बेमौसमी वर्षाले सर्लाहीका किसानको मेहनत पानीमा बगाएको छ । भित्र्याउने क्रममा रहेको धानबालीमा लगातारको झरीले ठूलो क्षति पुगेको छ ।

बरहथवा नगरपालिका–१४ का किसान विन्देश्वर रायले बिहीबारदेखि परेको वर्षाका कारण खेतमा राखिएको धान भिजेर नष्ट हुन थालेको बताए । ‘एक विघा खेतको धान काटेर राखिएको थियो । तर, पानीले सबै भिजायो,’ उनले भने, ‘भिजेको धान केही दिनमै उम्रिन थाल्छ, केही त कुहिएर कामै नलाग्ने भएको छ ।’

त्यस्तै, बागमती नगरपालिका–११ का किसान यज्ञ धिमालले पनि पानीले जमिन गलेपछि धानका बोट लड्ने र बोटमै बाला झर्ने समस्या देखिएको बताए । ‘समयमै वर्षा नभएर ढिलो रोपाइँ गरिएको थियो । अहिलेको झरीले फेरि धान नोक्सान पुर्यायो,’ उनले दुःख व्यक्त गरे ।

लगातारको वर्षाका कारण किसानहरू जबचखभकतष्लन रोक्न बाध्य भएका छन् । कतिपयले काटिएको धान खेतमै सुकाउने क्रममा क्षति पुगेको बताए । किसान विनोद यादवका अनुसार भित्र्याउने बेलामा पानी पर्नाले सारा मिहिनेत खेर गयो, मन अमिलो बनेको छ ।

बागमती नगरपालिका कृषि शाखाका प्राविधिक हिमाल शाहीका अनुसार जिल्लाभर वर्षाले काटिएको मात्र नभइ बोटमै रहेको धानमा पनि असर परेको छ । ‘जसोतसो उत्पादन भएको धान पनि कुहिने र अंकुरिन थाल्ने अवस्था छ,’ उनले भने ।

जिल्ला कृषि ज्ञान केन्द्रका प्रमुख कमलदेवप्रसाद कुशवाहले सर्लाहीका अधिकांश क्षेत्रका धानबालीमा क्षति पुगेको पुष्टि गरे । उनका अनुसार यस वर्ष जिल्लामा जम्मा ८० प्रतिशत मात्र धान रोपाइँ भएको थियो र ढिलो रोपाइँका कारण उत्पादनमा पहिले नै गिरावट हुने अनुमान थियो ।

कृषकहरूका अनुसार पहिले बाढी र हावाले धान लडाएको थियो । अहिलेको वर्षाले त्यसलाई डुबाएपछि धान पूर्ण रूपमा नोक्सान भएको छ ।