जनकपुरधाम, १५ कार्तिक । धनतेरस पर्वको पूर्वसन्ध्यामा भएको प्रहरी दुर्व्यवहारको विरोधमा जनकपुरधामका व्यापारीहरू आन्दोलित भएका छन् ।

जनकपुरधाम उद्योग वाणिज्य सङ्घले सुनचाँदी बजारमा भएको घटनाको निष्पक्ष छानबिन र दोषी प्रहरीमाथि कारबाहीको माग गर्दै शनिबारदेखि आन्दोलन थालेको हो ।

गत बुधबार राति जनकपुरधामस्थित सुनचाँदी बजारमा प्रहरीले छापा मार्ने क्रममा सङ्घका अध्यक्ष सुरेन्द्र भण्डारीमाथि कुटपिट गरेको थियो । सो क्रममा प्रहरीको कुटाइबाट अध्यक्ष भण्डारी घाइते भएका थिए ।

सङ्घ र स्थानीय व्यापारीहरूले घटनाको विरोधमा दुई चरणको आन्दोलनका कार्यक्रम घोषणा गर्दै प्रदर्शनमा उत्रिएका छन् ।

पहिलो चरण अन्तर्गत व्यापारीहरूले शनिबारदेखि आफ्ना पसलहरूमा कालो झन्डा झुन्ड्याएर र कालोपट्टी बाँधेर व्यवसाय सञ्चालन गरिरहेका छन् । उनीहरूले कात्तिक १७ गतेसम्म यस्तै शैलीमा विरोध जारी राख्ने बताएका छन् ।

माग सम्बोधन नभए दोस्रो चरणमा कात्तिक १८ गते बिहान ९ बजे नगर परिक्रमा, दिउँसो १२ बजेसम्म सम्पूर्ण बजार बन्द र जनक चोकमा कोणसभा तथा पत्रकार सम्मेलन गर्ने कार्यक्रम तय गरिएको सङ्घले जनाएको छ ।

प्रहरी स्रोतका अनुसार अवैध सुनचाँदी रहेको गोप्य सूचनाको आधारमा सो बजारमा छापा मारिएको थियो। छापा मार्ने क्रममा प्रहरीले एक पसलबाट करिब ७ किलो चाँदी नियन्त्रणमा लिएपछि व्यापारीहरू विरोधमा उत्रिएका थिए ।

व्यापारीहरूले प्रहरीले छापा मार्ने नाममा जबर्जस्ती चाँदी लुटेको आरोप लगाएका छन् ।