रौतहट, १५ कार्तिक । रौतहटको कटहरिया नगरपालिकामा करार तथा ज्यालादारी कर्मचारीहरूले तलब–भत्ताको माग गर्दै सुरु गरेको तालाबन्दी चौथो दिनसम्म पनि जारी छ ।

लामो समयदेखि बक्यौता तलब र सेवा–सुविधा नपाएको भन्दै उनीहरूले दोस्रो पटक नगरपालिकाको मुख्य कार्यालयदेखि वडा नं. १ देखि ९ सम्मका सम्पूर्ण कार्यालयमा ताला लगाएका हुन् ।

लगातार चार दिनदेखि कार्यालय बन्द हुँदा नगरका सेवाग्राहीहरू अत्यावश्यक प्रशासनिक कामका लागि बिचल्लीमा परेका छन् । कर्मचारीहरूले आफ्ना माग पूरा नभएसम्म आन्दोलन जारी राख्ने चेतावनी दिएका छन् ।

नगर प्रमुख अजय प्रकाश जयसवालले प्रमुख प्रशासकीय अधिकृतलाई तलब निकासा गर्न निर्देशन दिए पनि उनले अटेर गरेको कर्मचारीहरूको आरोप छ । कर्मचारीहरूले मेयर र प्रमुख प्रशासकीय अधिकृत दुवैले पटक–पटक आश्वासन दिएर पनि कार्यान्वयन नगरेको भन्दै अब विश्वास गर्न नसकिने बताएका छन् ।

यसैबीच, कटहरिया–४ बलिरामपुरस्थित श्री दलित प्राथमिक विद्यालयमा पनि अभिभावकहरूले अनिश्चितकालीन तालाबन्दी गरेका छन् ।
विद्यालयका प्रधानाध्यापक र व्यवस्थापन समिति अध्यक्षले पाँच वर्षदेखि आर्थिक हिसाबकिताब सार्वजनिक नगरेको र तीन वर्षदेखि २७३ विद्यार्थीको छात्रवृत्ति वितरण नगरेको आरोप लगाउँदै अभिभावकहरू आन्दोलित भएका हुन् ।

अभिभावकहरूले हिसाबकिताब सार्वजनिक नभएसम्म विद्यालयको ताला नखोल्ने चेतावनी दिएका छन् । नगरपालिकादेखि विद्यालयसम्म फैलिएको दोहोरो तालाबन्दीका कारण स्थानीय प्रशासन र सेवा–शिक्षा दुवै प्रभावित बनेका छन् ।