सर्लाही, ६ कार्तिक । सर्लाही प्रहरीले हुलाकी राजमार्गको कौडेना गाउँपालिका–२ फुलपरासी खण्डबाट ५ किलोभन्दा बढी गाँजा सहित दुई जनालाई पक्राउ गरेको छ ।

जिल्ला प्रहरी कार्यालय सर्लाहीका अनुसार नियमित गस्तीमा रहेको प्रहरी टोलीले शंकास्पद मोटरसाइकल जाँच गर्ने क्रममा गाँजा फेला पारेको हो ।

प्रहरी निरीक्षक रविन्द्र कार्कीको कमान्डमा खटिएको टोलीले सुखचैनाबाट फुलपरासीतर्फ गइरहेको मोटरसाइकललाई रोकेर तलासी लिँदा सिटमुनि प्लास्टिकमा बेरेर राखिएको ५ किलो ३०० ग्राम गाँजा बरामद भएको जिल्ला प्रहरी कार्यालयले जनाएको छ ।

गाँजासहित पक्राउ परेका व्यक्तिहरूमा कौडेना गाउँपालिका–१ सुन्दरपुरका १८ वर्षीय दिप नारायण ठाकुर र सोही ठाउँका ३० वर्षीय लोजा बैठा रहेका छन् । ती दुवैजना सोही मोटरसाइकलमा सवार रहेका थिए ।

प्रहरीका अनुसार बरामद गरिएको गाँजा अवैध रूपमा बिक्री वितरणका लागि लैजाँदै गरेको प्रारम्भिक अनुसन्धानबाट बुझिएको छ । मोटरसाइकल र गाँजा दुवै सामान प्रहरी नियन्त्रणमा लिएर आवश्यक कानुनी कारबाहीका लागि जिल्ला प्रहरी कार्यालय सर्लाहीमा राखिएको छ ।

प्रहरीले अब पक्राउ परेकाहरूमाथि स्रोत, गन्तव्य र सम्भावित संलग्न व्यक्तिहरूको पहिचानका लागि अनुसन्धान तीव्र पारेको जनाएको छ ।