रौतहट, ५ कार्तिक । रौतहटको चन्द्रपुर नगरपालिका–४ पश्चिम लच्का नजिक बुधबार बिहान यात्रुबाहक बसमा आगलागी हुँदा करिब ३५ लाख रुपैयाँ बराबरको क्षति भएको छ । यात्रुहरू सबै सकुशल रहे पनि बस पूर्णरूपमा जलेर नष्ट भएको प्रहरीले जनाएको छ ।

काठमाडौंबाट चन्द्रपुरतर्फ जाँदै गरेको बागमती प्रदेश–२–०३–००१ ख ५५५५ नम्बरको बसमा बिहान करिब ७ः२० बजे आगो लागेको थियो । इलाका प्रहरी कार्यालय चन्द्रनिगाहपुरकी प्रमुख डीएसपी रुपा लाबुङका अनुसार बसको ब्रेक जाम भएपछि ब्याट्रीको तार सर्ट भएर आगलागी भएको प्रारम्भिक अनुसन्धानले देखाएको छ ।

‘ब्रेक जाम हुँदा चालकले गाडी रोक्नेबित्तिकै तार सर्ट भएर आगो सल्किएको थियो,’ डिएसपी लाबुङले भनिन्, ‘सौभाग्यवश सबै यात्रु समयमै बाहिर निस्किन सफल भएकाले कुनै मानवीय क्षति भएको छैन ।’

घटनापछि स्थानीयवासी र प्रहरीको सहयोगमा बारुण यन्त्र परिचालन गरी करिब सवा ८ बजे आगो नियन्त्रणमा लिइएको थियो । आगलागीका कारण बस पूर्ण रूपमा जलेर नष्ट भएको र करिब ३५ लाख रुपैयाँ बराबरको आर्थिक क्षति भएको बस सञ्चालकले बताएका छन् ।

आगलागीका कारण केही समयका लागि पूर्व–पश्चिम राजमार्ग अवरुद्ध भएको थियो । तर, करिब एक घण्टापछि सवारी आवागमन सहज बनेको प्रहरीले जनाएको छ ।

प्रहरीले आगलागीको ठ्याक्कै कारण र सम्भावित लापरबाहीबारे थप अनुसन्धान सुरु गरेको बताएको छ ।