सप्तरी, ४ कार्तिक । सप्तरीमा शहरदेखि गाउँसम्म बोतलमा पेट्रोल बिक्री गर्ने प्रचलनले जोखिम बढाएको छ । अनियन्त्रित रूपमा राखिएको पेट्रोलका कारण पछिल्ला दुई दिनमा दुई वटा किराना पसलमा आगलागी भई लाखौँ रुपैयाँको क्षति भएको छ ।

राजविराज नगरपालिका–७ की ३९ वर्षीया मञ्जु राउतको किराना पसल आगलागी हुँदा खरानी बनेको छ । दिपावलीमा दियो बाल्ने क्रममा बिक्रीका लागि बोतलमा राखिएको पेट्रोल खनिँदा आगो सल्किएको स्थानीयले बताएका छन् ।

क्षणभरमै पसलभित्रको सम्पूर्ण सामान जलेर नष्ट भएको र आगो निभाउने प्रयासका क्रममा मञ्जु घाइते भएकी छन् । उनको खुट्टाको केही भाग जलेको छ । बैंकबाट ऋण लिएर सञ्चालनमा ल्याइएको कटघराको पसल पूर्णरूपमा जलेर खरानी बनेको र छिमेकी बलराम राउतको पसल पनि क्षतिग्रस्त भएको बताइएको छ ।

त्यसैगरी, सोमबार राति हनुमाननगर कंकालिनी नगरपालिका–१४ मा पनि यस्तै घटना भएको छ । तिलाठी कोइलाडी गाउँपालिका–४ घर भएका इन्द्र मुखियाको किराना पसलमा पेट्रोल हालेर कुपी बाल्दा आगलागी भई करिब ३ लाख ७८ हजार बराबरको क्षति भएको प्रहरीको भनाइ छ ।

दुवै घटनामा अति प्रज्वलनशील पदार्थ पेट्रोल नै कारण भएको स्थानीयले बताएका छन् । उनीहरूका अनुसार जिल्लाभर पान, किराना, ग्यारेज र सडककिनारका टहराहरूमा पेट्रोल बोतलमा बिक्री भइरहेकाले कहिले पनि ठूला दुर्घटना हुन सक्ने खतरा रहेको छ ।

कानुनअनुसार नेपाल आयल निगमबाट स्वीकृति प्राप्त पम्पहरूबाहेक पेट्रोल बिक्री गर्न नपाइने व्यवस्था भए पनि राजविराज, कञ्चनरूप, हनुमाननगरदेखि ग्रामीण क्षेत्रसम्म यस्ता अवैध बिक्री खुलेआम भइरहेका छन् ।

स्थानीय बासिन्दाले यस्तो अव्यवस्थित बिक्री रोक्न प्रशासन र प्रहरीलाई तत्काल कडा कारबाही गर्न आग्रह गरेका छन् ।