सर्लाही, ४ कार्तिक । धनकौल गाउँपालिका–५ हरकठवाकी ११ वर्षीया सोनीकुमारी साह मनुष्मारा खोलाले बगाएको पाँच दिनपछि मङ्गलबार मृत अवस्थामा फेला परेकी छन् । असोज ३० गते दिउँसो नुहाउन गएकी बेला उनी खोलाले बगाएर बेपत्ता भएकी थिइन् ।

बालिकालाई बगाएको स्थान धनकौल गाउँपालिका–३ क्षेत्र रहेको जिल्ला प्रहरी कार्यालय सर्लाहीले जनाएको छ । उनको शव करिब १० किलोमिटर दक्षिणतर्फ रामनगर गाउँपालिका–७ पछियारी टोल नजिकै मनुष्मारा खोलामा फेला परेको हो ।

घटनापछि प्रहरीले स्थानीय बासिन्दा र सशस्त्र प्रहरी बलको सहयोगमा खोजी कार्य तत्काल सुरु गरेको थियो । असोज ३१ र कार्तिक १ गते सशस्त्र प्रहरी बल बर्दिवासस्थित बाहिनीबाट गोताखोर टोली समेत पठाइएको थियो । तर, दुई दिनको प्रयासपछि पनि सोनीकुमारीको खोजी हुन नसकेपछि टोली कात्तिक १ गते साँझ बर्दिवास फर्किएको थियो ।

मङ्गलबार बिहान स्थानीयहरूले खोलाको पानीमा घोप्टो परिरहेको अवस्थामा बालिकाको शव देखेपछि प्रहरीलाई जानकारी गराएका थिए । त्यसपछि प्रहरी टोली घटनास्थलमा पुगेर शव उद्धार गरेको हो ।

जिल्ला प्रहरी कार्यालय सर्लाहीका प्रवक्ता प्रहरी नायब उपरीक्षक सरोज राईका अनुसार मृतकको शवलाई पोष्टमार्टमका लागि प्रादेशिक अस्पताल मलङ्गवा ल्याइएको छ । मृतकको सनाखत उनका दाजु चन्दन साहले गरेका हुन् ।

स्थानीय बासिन्दाका अनुसार पछिल्ला दिनमा मनुष्मारा खोलामा लगातार वर्षाका कारण पानीको बहाव तीव्र भएको छ । यसले गर्दा खोलामा नुहाउने, खेल्ने वा पार गर्ने क्रममा जोखिम बढेको छ ।