रौतहट, ४ कार्तिक । रौतहट प्रहरीले ठूलो परिमाणको नशालु इन्जेक्सनसहित एक महिलालाई पक्राउ गरेको छ ।

सोमबार साँझ गौर–चन्द्रनिगाहपुर सडकखण्डअन्तर्गत यमुनामाई गाउँपालिका–५ बमनहर नजिक चेकजाँचका क्रममा ती महिलालाई नियन्त्रणमा लिइएको हो ।

जिल्ला प्रहरी कार्यालय रौतहटका अनुसार स्थायी प्रहरी चौकी बमनहरबाट खटिएको गस्ती टोलीले गौरबाट चपुरतर्फ जाँदै गरेको ना ५ ख ५०६३ नम्बरको यात्रुवाहक बस लाई रोकेर नियमित जाँच गर्दा ती महिलामाथि शंका लागेपछि तलासी लिँदा ठूलो परिमाणमा लागुऔषध फेला परेको थियो ।

पक्राउ परेकी महिला म्याग्दीको बेनी नगरपालिका–९ फुलचौरकी ६० वर्षीया दिलमाया बिक हुन् । प्रहरीका अनुसार उनको साथबाट फेनारगन ४९८ पिस, डाईजोपाम ४९१ पिस, नुफिन ४०० पिस र बुप्रेनोर्फिन १०० पिस गरी जम्मा १,४८९ पिस नशालु इन्जेक्सन बरामद गरिएको छ ।

जिल्ला प्रहरी कार्यालय रौतहटका प्रवक्ता प्रहरी नायब उपरीक्षक राजु कार्कीका अनुसार पक्राउ परेकी महिलालाई बरामद गरिएको लागुऔषधसहित थप अनुसन्धानका लागि जिल्ला प्रहरी कार्यालय गौरमा पठाइएको छ ।

प्रहरीले चाडपर्वलाई लक्षित गर्दै लागुऔषध र अन्य अवैध पदार्थ ओसारपसारमा निगरानी बढाएको जनाएको छ । यसअघि पनि रौतहटको दक्षिणी सीमाक्षेत्र हुँदै नशालु पदार्थ तस्करीको घटनामा वृद्ध–महिला र युवाहरू संलग्न हुँदै आएको प्रहरीले जनाएको छ ।