जनकपुरधाम, १ कार्तिक । जनकपुरधाम उद्योग वाणिज्य संघले अध्यक्ष सुरेन्द्र कुमार भण्डारीमाथि प्रहरीद्वारा गरिएको सांघातिक आक्रमणको निन्दा र विरोध गरेको छ ।

संघले धनुषा प्रहरीले व्यापारी र संघका पदाधिकारीमाथि ‘लुटपाट शैलीमा’ आक्रमण गरेको आरोप लगाउँदै दोषी प्रहरीमाथि तत्काल निलम्बन र कानुनी कारबाहीको माग गरेको हो ।

संघका अनुसार शुक्रबार साँझ करिब ६ः१५ बजे जिल्ला प्रहरी कार्यालय धनुषाका प्रहरी नायव उपरीक्षक गणेश बहादुर बमको नेतृत्वमा आएको प्रहरी टोलीले जनकपुरधाम उपमहानगरपालिका–५ स्थित संजय पायल ज्वेलर्समा बिना कुनै पूर्वजानकारी र कानुनी प्रक्रिया पसलमा जबरजस्ती छापा मारेको थियो ।

संघले दिएको विवरणअनुसार प्रहरीले तिजोरीमा रहेको चाँदीका गरगहना र पसलको काउण्टरमा रहेका अन्य गरगहना जबरजस्ती लुट्ने प्रयास गरेको थियो । पसलका सञ्चालक सञ्जय ठाकुर र उनका परिवारले प्रहरीलाई मुचुल्का गर्न वा कानुनी प्रक्रिया पालना गर्न आग्रह गर्दा समेत टोली आक्रामक बनेको र ठाकुरकी श्रीमतीमाथि समेत हातपात गरेको आरोप लगाइएको छ ।

त्यसपछि घटनास्थलमा पुगेका संघका अध्यक्ष सुरेन्द्र भण्डारीले प्रहरीले अपनाएको कार्यशैलीप्रति आपत्ति जनाउँदै ‘तपाईंहरूले मुचुल्का बिना सामान लैजान पाउनुहुन्न, कानुनी प्रक्रिया अपनाउनुहोस्’ भनेर आग्रह गर्दा प्रहरी टोलीले उनलाई लक्षित गर्दै लाठी र बुट प्रहार गरेको संघले जनाएको छ ।

संघका अनुसार उक्त आक्रमणमा अध्यक्ष भण्डारीको टाउको फुटेको र शरीरका विभिन्न भागमा चोट लागेको छ । उनलाई मरणासन्न अवस्थामा प्रादेशिक अस्पताल जनकपुरधाममा पुर्याइएको र अहिले आईसीयूमा उपचार भइरहेको संघले जानकारी दिएको छ ।

संघले भनेको छ, ‘जनकपुरधाम उद्योग वाणिज्य संघका अध्यक्षमाथिको आक्रमण केवल एक व्यक्तिमाथिको आक्रमण नभई सम्पूर्ण व्यवसायी समुदायमाथिको आक्रमण हो । प्रहरी प्रशासनले कानुनको मर्यादा मिच्दै लुटपाट शैलीमा व्यापारीलाई आतंकित पारेको छ । यसले कानुनी राज्यको उपहास गरेको छ ।’

संघले यस घटनाको जिम्मेवारी डीएसपी गणेश बहादुर बम र घुमुवा प्रहरी मनोज कुमार यादवमाथि तोकेको छ । उनीहरुलाई तत्काल निलम्बन गरी निष्पक्ष छानबिन सुरु गर्न माग गरेको छ । साथै, प्रहरीद्वारा लुटेर लगिएको गरगहना तुरुन्तै फिर्ता गरिनुपर्ने संघको माग छ ।

संघले कात्तिक १२ गतेसम्म दोषीमाथि कारबाही र माग पूरा नभए चरणबद्ध आन्दोलन सुरु गर्ने चेतावनी दिएको छ । सो क्रममा बजार बन्द, विरोध र प्रदर्शनजस्ता कार्यक्रम हुन सक्ने चेतावनी दिइएको छ ।

संघका वरिष्ठ उपाध्यक्ष मनोज कुमार साह र महासचिव फुलदेव पण्डितद्वारा हस्ताक्षरित ज्ञापनपत्र गृहमन्त्रालय, प्रहरी प्रधान कार्यालय, प्रधानमन्त्री तथा मन्त्रिपरिषद् कार्यालय र मधेश प्रदेशका मुख्यमन्त्री तथा मन्त्रीपरिषद् कार्यालयमा पठाइएको छ ।

संघले नागरिकको व्यापार व्यवसाय गर्ने अधिकार संविधानले सुनिश्चित गरेको मौलिक हक भएको उल्लेख गर्दै भनेको छ, ‘सुरक्षा दिनुपर्ने प्रहरी स्वयं व्यापारीमाथि हातपात गर्ने र लुटपाट शैली अपनाउने कार्य सह्य छैन । मधेश प्रदेश सरकारले यस विषयमा तत्काल हस्तक्षेप गरी व्यवसायी समुदायमा सुरक्षाको भरोसा जगाउनुपर्छ ।’

जनकपुरधामका व्यवसायी समुदाय आक्रोशित बनेका छन् । उनीहरूले दोषी प्रहरीमाथि तत्काल कारबाही र व्यवसायीहरूको सुरक्षाको ग्यारेन्टी माग गर्दै आन्दोलनको तयारी थालेका छन् ।