जनकपुरधाम, १ कार्तिक । । नेपाल प्रिमियर लिग (एनपीएल) को दोस्रो संस्करण प्रारम्भ हुनुअघि प्रतियोगिताको ट्रफी परेड शनिबार मधेश प्रदेशको राजधानी जनकपुरधाममा सम्पन्न भएको छ । नेपाल क्रिकेट संघ (क्यान) द्वारा आयोजित सातै प्रदेशको ट्रफी परेड अभियान अन्तर्गत आज जनकपुरधाममा ट्रफी प्रदर्शन गरिएको हो ।

कार्यक्रमको शुरुवात जानकी मन्दिरमा पूजा अर्चना गरी गरिएको थियो । ट्रफीलाई त्यसपछि जनकपुरधामको मुख्य सडक हुँदै नगरका विभिन्न क्षेत्रको परिक्रमा गराइयो । ट्रफी परेडको समापन बसपार्क नजिकै रहेको सीताशरण होटेलमा एक संक्षिप्त समारोहका साथ गरिएको थियो ।

ट्रफी परेडमा स्थानीय युवाहरू, क्रिकेटप्रेमी, खेलकर्मी, समाजसेवी तथा जनकपुर बोल्ट्सका समर्थकहरूको उल्लेखनीय सहभागिता देखिएको थियो । त्यस अवसरमा रंगीन झाँकी, ब्यानर र क्रिकेटप्रेमीहरूको उत्साहले जनकपुरधामका सडकहरू केही समयका लागि खेलमय बनेका थिए ।

नेपाल क्रिकेट संघ (क्यान) धनुषाका पदाधिकारीहरूले जनकपुरधाममा ट्रफी परेड आयोजना गर्नु मधेश प्रदेशका क्रिकेटप्रेमीहरूको भावना र गौरवसँग जोडिएको क्षण भएको बताएका छन् ।

नेपाल क्रिकेट संघ धनुषाका आकाश पाण्डेयले भने, ‘जनकपुरधाम क्रिकेटको भावनाले भरिएको शहर हो । यहाँको ऊर्जा र उत्साहले एनपीएलको दोस्रो संस्करणलाई अझ रोचक बनाउनेछ ।’

जनकपुर बोल्ट्सका सदस्य र प्रशंसकहरूका लागि यो कार्यक्रम विशेष महत्त्वको रह्यो । जनकपुर बोल्ट्स एनपीएलको पहिलो संस्करणको विजेता टोली हो । आयोजकले जनकपुरधाममा भएको परेडलाई पहिलो संस्करणका विजेताप्रति सम्मानको रूपमा पनि व्याख्या गरेका छन् ।

मधेश प्रदेशमा सम्पन्न ट्रफी परेडपछि क्यानले यो अभियानलाई अन्य प्रदेशहरूमा समेत निरन्तरता दिने तयारी गरेको छ । यसअन्तर्गत ट्रफी क्रमशः लुम्बिनी, गण्डकी, बागमती, कर्णाली र सुदूरपश्चिम प्रदेशमा लैजाने कार्यक्रम तय गरिएको छ ।

एनपीएलको दोस्रो संस्करण चाँडै सुरु हुने तयारीमा छ । यस पटक लिगमा नयाँ व्यवस्थापन प्रणाली, अद्यावधिक खेल तालिका र दर्शकका लागि थप आकर्षणका कार्यक्रमहरू समावेश गरिने क्यानले जनाएको छ ।

तस्बिरहरु : संजय कुमार साह र घनश्याम मिश्र