जनकपुरधाम, ३१ असोज । जनकपुरधाम उद्योग वाणिज्य संघले धनुषा प्रहरीले व्यापारीमाथि लुटपाटको शैलीमा आक्रमण गरेको आरोप लगाएको छ । संघका अध्यक्ष सुरेन्द्र भण्डारी प्रहरीको लाठी प्रहारबाट गम्भीर घाइते भई हाल प्रादेशिक अस्पताल जनकपुरधामको आईसीयूमा उपचाररत छन् ।

संघको आकस्मिक बैठकपछि शुक्रबार रात जारी विज्ञप्तिमा भनिएको छ, ‘प्रहरीको गतिविधि लुटपाट र आतंक सिर्जना गर्ने शैलीमा भएको छ । यसले व्यापारी समुदायमा असुरक्षाको गहिरो वातावरण बनाएको छ ।’

घटना जनकपुरधाम उपमहानगरपालिका–६ सोनारपट्टीस्थित सञ्जय पायल ज्वेलर्समा शुक्रबार साँझ करिब सवा ६ बजे भएको हो । जिल्ला प्रहरी कार्यालय धनुषाका प्रहरी नायव उपरीक्षक गणेश बमको नेतृत्वमा गएको प्रहरी टोलीले बिना लिखित आदेश वा प्रमाण पसलमा छापा मारेको संघको आरोप छ ।

विज्ञप्तिअनुसार प्रहरीले तिजोरीमा रहेको चाँदी र काउन्टरमा राखिएका गरगहना जबर्जस्ती लिएर जान खोज्दा पसले सञ्जय ठाकुरले विरोध गरेका थिए । सो क्रममा तत्कालै घटनास्थलमा पुगेका संघका अध्यक्ष भण्डारीले छापा कुन निकायको आदेशमा गरिएको हो भन्ने बुझ्न खोज्दा प्रहरीसँग वादविवाद भएको थियो ।

संघका अनुसार पसलबाट गरगहना लैजान लाग्दा व्यापारीहरूले मुचुल्का बनाई मात्र लैजान सकिने अडान लिएपछि प्रहरीले भीडमाथि लाठी प्रहार गरेको थियो । त्यस क्रममा अध्यक्ष भण्डारीसहित केही व्यापारी घाइते भएका थिए ।

संघले घटनालाई व्यापारिक समुदायमाथिको आतङ्क भन्दै दोषी प्रहरीमाथि तत्काल कारबाही गर्न सरकारसँग माग गरेको छ ।

संघको विज्ञप्तिमा सुरक्षाकर्मीको भूमिकामा विश्वासको संकट उत्पन्न भएको आरोप लगाइएको छ । यस्तो दुराचरण दोहोरिए जनकपुरधामका व्यवसायीहरु सडकमा उत्रिन बाध्य हुने चेतावनीसमेत दिइएको छ ।

संघले प्रहरी प्रशासनलाई व्यवसायीको सम्मान र कानुनी प्रक्रियाको पालना गर्न आग्रह गरेको छ ।

एता, जिल्ला प्रहरी कार्यालय धनुषा स्रोतले भने घटनाबारे आन्तरिक छानबिन भइरहेको र आधिकारिक धारणा पछि सार्वजनिक गर्ने जनाएको छ ।