जनकपुरधाम, ३१ असोज । जनकपुरधाममा शुक्रबार साँझ प्रहरी र स्थानीय व्यवसायीबीच भएको झडपमा जनकपुरधाम उद्योग वाणिज्य संघका अध्यक्ष सुरेन्द्र भण्डारी गम्भीर घाइते भएका छन् ।

प्रहरीले भीड नियन्त्रणका क्रममा लाठीचार्ज, हवाई फायर र अश्रुग्यास प्रहार गरेपछि घटनास्थलमा स्थिति केही समय तनावपूर्ण बनेको थियो ।

अध्यक्ष भण्डारीको टाउको र शरीरका विभिन्न भागमा चोट लागेका कारण उनको जनकपुरधामस्थित प्रादेशिक अस्पतालमा उपचार भइरहेको छ । चिकित्सकहरूले भण्डारीको स्वास्थ्य अवस्था मध्यम गम्भीर रहेको बताएका छन् ।

घटनाको शुरुवात जनकपुरधाम उपमहानगरपालिका–६ सोनारपट्टीस्थित सञ्जय ज्वेलर्समा प्रहरीले छापा मार्ने क्रममा भएको हो । केही दिनअघि सो पसलमा अवैध सुन कारोबार भएको सूचना प्राप्त भएपछि प्रहरी टोली छापा मार्न पुगेको जनाइएको छ ।

तर, प्रहरीको कार्यशैलीप्रति असन्तुष्टि जनाउँदै स्थानीय व्यवसायीहरूले विरोध जनाएपछि तनाव चर्किएको थियो । व्यवसायीहरूले प्रहरीलाई अनावश्यक बल प्रयोग गरी आतंक फैलाएको आरोप लगाएका छन् ।

एक स्थानीय व्यवसायीका अनुसार प्रहरीले कुनै पूर्वजानकारी बिना पसलमा छापा मार्यो, व्यापारीलाई धम्की दियो र विरोध गर्दा लाठी प्रहार गर्यो । संघका अध्यक्षलाई समेत नछोड्नु अमानवीय व्यवहार हो ।

यता, जिल्ला प्रहरी कार्यालय धनुषाका प्रवक्ता प्रहरी नायव उपरिक्षक गणेश बमले प्रहरीको कार्य कानुनी दायराभित्र भएको दाबी गरेका छन् । उनका अनुसार प्रहरीले सूचना प्राप्त भएपछि नियमित अनुगमनका लागि टोली पठाएको थियो । तर, केही व्यवसायीहरू आक्रामक भएपछि स्थिति नियन्त्रण गर्न लाठीचार्ज र हवाई फायर गर्नुपर्यो ।

घटनापछि जनकपुरधाम उद्योग वाणिज्य संघले घटनाको कडा विरोध गरेको छ । संघका पदाधिकारीहरूले प्रहरी प्रशासनले व्यावसायिक समुदायप्रति अमर्यादित व्यवहार गरेको भन्दै दोषीमाथि कारबाहीको माग गरेका छन् ।

संघका एक पदाधिकारीले भने, ‘अध्यक्ष भण्डारीमाथिको आक्रमण सम्पूर्ण व्यवसायी समुदायमाथिको आक्रमण हो । प्रहरी प्रशासनले तत्काल माफी मागेर घटनाको निष्पक्ष छानबिन गर्नुपर्छ ।’

संघले यदि घटनामा संलग्न प्रहरीलाई निलम्बन गरी छानबिन नगरिए भोलि जनकपुरधाम बजार क्षेत्र बन्द गर्ने चेतावनीसमेत दिएको छ ।