जनकपुरधाम, ३१ असोज । जनकपुरधामको व्यस्त व्यापारीक क्षेत्र सोनारपट्टीमा शुक्रबार साँझ प्रहरी र स्थानीय व्यवसायीबीच झडप हुँदा प्रहरीले हवाई फायर तथा अश्रुग्यास प्रहार गरेको छ । घटनापछि केहीबेर क्षेत्र तनावपूर्ण बनेको थियो ।

जिल्ला प्रहरी कार्यालय धनुषाको टोलीले बिल–बिजकबिना सुनचाँदी कारोबार भइरहेको सूचनाको आधारमा सञ्जय ज्वेलर्स नामक पसलमा छापा मार्न पुगेको थियो । प्रहरीको प्रवेशमा असन्तुष्ट व्यवसायीहरूले विरोध जनाएपछि स्थिति नियन्त्रितभन्दा बाहिर गएको प्रहरीले जनाएको छ ।

प्रत्यक्षदर्शीहरूका अनुसार प्रहरी टोली पसलभित्र प्रवेश गरेलगत्तै वरपरका अन्य व्यवसायीहरूले पनि घटनास्थलमा भीड जम्मा गरे । प्रहरीले पसल सञ्चालकसँग कागजात माग्दा ती व्यक्तिले अपमानजनक व्यवहार गरेको र त्यसपछि वादविवाद बढ्दै गएको बताइएको छ ।

एक स्थानीय व्यवसायीले भने, ‘प्रहरीले कुनै पूर्वजानकारी बिना छापा मार्याे, जब हामीले कारण सोध्यौं उल्टै बल प्रयोग गर्यो । त्यसपछि स्थिति एकछिनमै बिग्रियो ।’

झडप बढ्दै गएपछि प्रहरीले भीड नियन्त्रणका लागि लाठीचार्ज गरेको र केही राउन्ड हवाई फायरसमेत गरेको थियो । त्यस क्रममा केही व्यवसायी घाइते भएको जानकारी छ ।

जिल्ला प्रहरी कार्यालय धनुषाका प्रवक्ता प्रहरी नायव उपरिक्षक गणेश बमले बताएअनुसार प्रहरीको टोली नियमित अनुगमनकै क्रममा गएको थियो । उनका अनुसार प्रहरीलाई केही सुनचाँदी पसलमा अवैध कारोबार र कर छल भइरहेको सूचना प्राप्त भएको थियो । त्यसकै अनुगमन गर्न टोली पुगेको थियो । तर, भीडले अवरोध गरेपछि स्थिति नियन्त्रण गर्न बाध्य भएर हवाई फायर र अश्रुग्यास प्रहार गर्नुपर्यो ।

यता, जनकपुरधाम उद्योग वाणिज्य संघका प्रतिनिधिहरूले प्रहरीको ‘अनावश्यक बल प्रयोग’प्रति आपत्ति जनाएका छन् । उनीहरूले घटनाको निष्पक्ष छानबिन र जिम्मेवार प्रहरीमाथि कारबाहीको माग गरेका छन् ।

संघका एक सदस्यले भने, ‘सुनचाँदी व्यवसायीहरूमाथि डर देखाएर प्रहरीले आतंक सिर्जना गरेको छ । अनुगमनका नाममा बल प्रयोग गर्न मिल्दैन ।’