जनकपुरधाम, ३१ असोज । जनकपुरधामस्थित राजर्षि जनक पतंजली योग साधना केन्द्रले गुठी संस्थान जनकपुरधाम शाखामाथि भूमाफियासँग मिलेमतो गरी धार्मिक तथा सार्वजनिक जग्गा कब्जा गर्न खोजेको आरोप लगाएको छ ।

केन्द्रले जनकपुरधाम उपमहानगरपालिका–८ स्थित ऐतिहासिक कपालमोचनी पोखरीको डिलमा रहेको गुठी तैनाथी जग्गा कब्जा गर्ने उद्देश्यले संस्थानले सूचना जारी गरेको भन्दै त्यसविरुद्ध विरोध प्रदर्शन गरेको हो ।

शुक्रबार बिहान साधना केन्द्रका पदाधिकारी र योग साधकहरूको टोली गुठी संस्थान जनकपुरधाम कार्यालय पुगेर सात बुँदे मागसहित ज्ञापनपत्र बुझाएको थियो ।

साधना केन्द्रका पदाधिकारीहरूले बुझाएको ज्ञापनपत्रमा सिट नम्बर १३५५–१७ तथा कित्ता नम्बर ५८ को करिब ७ कठ्ठा गुठी जग्गासम्बन्धी गत असोज १२ गते प्रकाशित सूचना तत्काल स्थगित गर्न माग गरिएको छ ।

साथै, केन्द्र र गुठी संस्थानबीच विगतमा भएको सम्झौता नवीकरण गर्न, कपालमोचनी पोखरी क्षेत्रको सीमा र स्वामित्व स्पष्ट गर्न र धार्मिक तथा योग साधनासँग सम्बन्धित परियोजनामा प्रदेश वा संघ सरकारको लगानी सुनिश्चित गर्न पनि माग गरिएको छ ।

केन्द्रका पदाधिकारीहरूले गुठी संस्थानको केही अधिकारी भूमाफियासँगको साँठगाँठमा धार्मिक स्थलको जग्गा हडप्ने तयारी रहेको आरोप लगाएका छन् । पतंजली योग साधना केन्द्रले २०६५ सालदेखि सो क्षेत्रमा योग शिविर, आयुर्वेद प्रशिक्षण र निःशुल्क स्वास्थ्य सेवा सञ्चालन गर्दै आएको छ । त्यसलाई अब हटाउने षड्यन्त्र भइरहेको छ ।

गुठी संस्थान जनकपुरधाम शाखाले भने उक्त आरोप अस्वीकार गरेको छ । संस्थानका एक अधिकृतले बताएअनुसार सो जग्गासम्बन्धी सूचना असोज १२ गते प्रकाशित भए पनि स्थानीय पक्षहरूको आपत्ति र विवादका कारण अहिले त्यसलाई स्थगित गरिएको छ ।

उनले भने, ‘हामीले कुनै पनि व्यक्तिलाई अन्याय गर्ने वा जग्गा कब्जा गराउने उद्देश्य राखेका छैनौं । यो क्षेत्र धार्मिक दृष्टिले महत्वपूर्ण भएकाले यसको व्यवस्थित व्यवस्थापन आवश्यक छ ।’

संस्थानका अनुसार हाल पोखरी क्षेत्र र वरपरको जग्गा वर्षौंदेखि अव्यवस्थित रूपमा प्रयोग भइरहेको छ । त्यसका कारण मापदण्डअनुसारको व्यवस्थापन र सीमाङ्कन अपरिहार्य बनेको छ ।

कपालमोचनी पोखरी जनकपुरधामको एक ऐतिहासिक धार्मिक स्थल हो । यहाँ मेला, साधना र पूजाआजाका कार्यक्रम नियमित रूपमा हुँदै आएका छन् । स्थानीय बासिन्दाहरूका अनुसार पोखरी वरपरको क्षेत्र धार्मिक तथा सार्वजनिक प्रयोजनका लागि मात्र प्रयोग हुनुपर्ने हो ।

उता, साधना केन्द्रका पदाधिकारीहरूले भने माग पूरा नभए कपालमोचनी पोखरी परिसरमा आमरण अनशन तथा जनआन्दोलन गर्ने चेतावनी दिएका छन् ।