रौतहट, ३० असोज । आगामी फागुन २१ गतेका लागि तोकिएको प्रतिनिधि सभा निर्वाचनलाई लक्षित गर्दै रौतहटमा मतदाता नामावली संकलन कार्य तीव्र गतिमा भइरहेको छ । जिल्ला निर्वाचन कार्यालय रौतहटले संकलन कार्यलाई तीव्रता दिएसँगै दैनिक सयौंको संख्यामा नयाँ मतदाता थपिँदै गएका छन् ।

जिल्ला निर्वाचन अधिकारी छोटेलाल दासका अनुसार विशेषगरी युवाहरू मतदाता नामावली दर्तामा उल्लेखनीय रूपमा उत्साहित देखिएका छन् । उनले भने, ‘जेनजी पुस्ताका युवाहरूमा मतदान अधिकारप्रति चासो बढेको छ । उनीहरू आफ्ना मतका माध्यमबाट देशको भविष्य निर्माणमा सहभागी हुन चाहन्छन् ।’

सरकारले युवाहरूलाई मताधिकारको पहुँचमा ल्याउन अध्यादेशमार्फत नामावली संकलन कार्यक्रम अघि बढाएको हो । असोज १० गतेदेखि सुरु भएको यो अभियान कात्तिक ३० गतेसम्म सञ्चालन हुने निर्वाचन कार्यालयले जनाएको छ ।

२०७९ सालको निर्वाचनमा रौतहटमा कुल ४ लाख १५ हजार ४ सय ५५ मतदाता दर्ता भएका थिए । त्यसमा २ लाख २७ हजार २ सय २९ पुरुष, १ लाख ८८ हजार २ सय २५ महिला र एक तेस्रो लिंगी मतदाता रहेका थिए । तर, आगामी निर्वाचन मिति अर्थात् २०८२ फागुन २१ सम्म आइपुग्दा मतदाता संख्या ४ लाख २१ हजार ६ सय ९३ पुगेको जिल्ला निर्वाचन कार्यालयले जनाएको छ । यसरी तीन वर्षको अवधिमा ६ हजार २ सय ३८ मतदाता थपिएका छन् ।

असोज १० देखि २९ गतेसम्मको अवधिमा मात्रै ५३१ पुरुष र २८५ महिला गरी ८१६ नयाँ मतदाता दर्ता भएका छन् । दशैं बिदा र हालैको बाढीका कारण केही दिन संकलन कार्य प्रभावित भए पनि अहिले पुनः तीव्र गतिमा अघि बढेको अधिकारी दासले जानकारी दिए ।

१६ वर्ष उमेर पूरा गरी नेपाली नागरिकता प्राप्त गरेका जो कोहीले मतदाता नामावलीमा नाम दर्ता गराउन पाउने व्यवस्था रहेको छ । यसले विशेषगरी पहिलो पटक मतदान गर्न योग्य भएका युवा वर्गमा उत्साह थपेको छ ।

हाल मतदाता नामावली दर्ता गौरस्थित जिल्ला निर्वाचन कार्यालयमै सीमित भएकाले ग्रामीण क्षेत्रका नागरिकलाई लामो दूरी तय गर्नुपर्ने बाध्यता छ ।

स्थानीयवासीहरूले इलाका प्रशासन कार्यालय र स्थानीय तहहरूबाट पनि नामावली संकलनको व्यवस्था मिलाउन सरकारसँग माग गरेका छन् ।