पर्सा, २८ असोज । सशस्त्र प्रहरी बल पर्सा र राजस्व अनुसन्धान कार्यालय बाराको संयुक्त टोलीले वीरगंज महानगरपालिका–६ माईस्थानस्थित अभिषेक ज्वेलर्सका सञ्चालक अभिषेक सर्राफको घरमा छापा मार्दै ठूलो परिमाणमा अवैध सुन, चाँदी र नगद बरामद गरेको छ ।

विशेष सूचनाका आधारमा सोमबार बिहानदेखि रातीसम्म चलेको सो छापामारीमा भन्सार छली ल्याइएको सुन र चाँदी फेला परेको सशस्त्र प्रहरीले जनाएको छ ।

सशस्त्र प्रहरी बल नेपाल नम्बर १३ गण मुख्यालय पर्सा र राजस्व अनुसन्धान कार्यालय बाराको टोलीले सर्राफको घर, पसल र गोदाममा संयुक्त रूपमा गरिएको खानतलासीका क्रममा २ किलो २ सय ५४।८६ ग्राम सुन, १० किलो ३ सय ५४.०७ ग्राम चाँदी, ५५९.१० ग्राम सुनजस्तो देखिने धातु, ५५० ग्राम चाँदीजस्तो देखिने धातु, नेपाली रुपैयाँ १ लाख ९ हजार र भारतीय रुपैयाँ ४१ हजार ६० बरामद गरेको हो ।

नेपाल सुनचाँदी व्यवसायी महासङ्घले असोज २७ गते सार्वजनिक गरेको मूल्यका आधारमा बरामद सम्पत्तिको कुल बजार मूल्य करिब ६ करोड १२ लाख १ हजार ८८७ रुपैयाँ १६ पैसा रहेको सशस्त्र प्रहरीले जनाएको छ । यसमध्ये वास्तविक सुनको मूल्य ४ करोड ६४ लाख ७७ हजार २९४ रुपैयाँ ७१ पैसा र वास्तविक चाँदीको मूल्य २८ लाख ५८ हजार १७८ रुपैयाँ ६९ पैसा रहेको बताइएको छ ।

त्यस्तै, सुनजस्तो र चाँदीजस्तो देखिने धातुहरूको मूल्य क्रमशः १ करोड १५ लाख ३९ हजार ८९० रुपैयाँ ९५ पैसा र १ लाख ५१ हजार ८२७ रुपैयाँ ५० पैसा हुने अनुमान गरिएको छ । बरामद नगद र भारतीय रुपैयाँ समेत गरी सम्पूर्ण वस्तुहरूको मापन तथा मूल्याङ्कन सुनचाँदी व्यवसायी संघ पर्सामा गराई राजस्व अनुसन्धान कार्यालय पथलैया बारामा बुझाइएको सशस्त्र प्रहरी नायव उपरीक्षक सुरज कार्कीले जानकारी दिए ।

राजस्व अनुसन्धान कार्यालयका प्रमुख अनुसन्धान अधिकृत हरि प्रसाद शर्माका अनुसार राजस्व चुहावटको सूचनाका आधारमा गरिएको छापामारीमा कारोबारसँग सम्बन्धित कागजात, खाता, कम्प्युटर र अन्य प्रमाणहरू समेत कब्जामा लिइएका छन् । उनले राजस्व चुहावट (अनुसन्धान तथा नियन्त्रण) ऐन, २०५२ बमोजिम कारबाही अघि बढाइएको र सुनचाँदी व्यवसायी महासङ्घका प्रतिनिधिको उपस्थितिमा मुचुल्का उठाउने प्रक्रिया पूरा भएको जानकारी दिए ।

छापामारीको क्रममा ठूलो संख्यामा नेपाल प्रहरी र सशस्त्र प्रहरी परिचालन गरिएको थियो । तर, घटनापछि वीरगंजका सुनचाँदी व्यवसायीहरूले छापामारीको विरोध गर्दै सडकमा नाराबाजी र प्रदर्शन गरे । उनीहरूले राजस्व अनुसन्धान कार्यालयले व्यवसायीहरूलाई अनावश्यक रूपमा हैरान पार्दै आएको आरोप लगाउँदै घरमा सामग्री राखेकै कारण अनुसन्धान गर्नु अनुचित भएको बताएका थिए ।

विरोध प्रदर्शन केहीबेरमा चर्किँदा व्यवसायीहरूले सडक समेत अवरुद्ध गरेपछि वीरगंज बजारमा तनावपूर्ण अवस्था सिर्जना भएको थियो । प्रहरी नियन्त्रणमा लिइएका अभिषेक सर्राफलाई लैजाने क्रममा व्यवसायीहरूले माइस्थान चोकमा गाडी रोकेर मन्दिरतर्फ मोड्ने प्रयाससमेत गरेका थिए ।

स्थिति बिग्रिन नदिने उद्देश्यले पर्साका प्रहरी प्रमुख एसपी सुदीप राज पाठक र सशस्त्र प्रहरी गण १३ का प्रमुख एसपी पूरणचन्द्र भट्ट आफैं घटनास्थल पुगेका थिए । थप सुरक्षाकर्मी परिचालन गर्दै स्थिति नियन्त्रणमा लिइएको प्रहरीले जनाएको छ ।

सोमबार साँझसम्म चलेको विस्तृत छानबिनपछि राजस्व अनुसन्धान टोलीले बरामद सबै सुन, चाँदी, नगद र कागजात बाराको पथलैयास्थित कार्यालयमा पुर्याएको थियो । स्रोतका अनुसार अनुसन्धान टोलीले अभिषेक सर्राफलाई नियन्त्रणमा लिएर राजस्व छली र अवैध सुन कारोबारसम्बन्धी अनुसन्धान औपचारिक रूपमा सुरु गरेको छ ।