महोत्तरी, २८ असोज । मधेश प्रदेशका बाढी र डुबानपीडित परिवारलाई राहत सहयोग प्रदान गरिएको छ । हालैको बाढीबाट प्रभावित पाँच जिल्लाका एक हजार दुई सयभन्दा बढी परिवारलाई सेभ द चिल्ड्रेनले राहत सामग्री वितरण गरेको हो ।

सेभ द चिल्ड्रेनका सञ्चार संयोजक झम्केश्वर ओझाका अनुसार राहतमा अस्थायी आवासका लागि सेल्टर किट, खाना पकाउने भाँडाकुडा सेट, स्वच्छता सामग्री (हाइजिन किट), झुल, गर्भवती र सुत्केरी महिलाका लागि मर्यादा किट (डिग्निटी किट) तथा लाइफ ज्याकेटसमेत समावेश छन् ।

यी सामग्री महोत्तरी, बारा, सर्लाही, रौतहट र सप्तरीका १३ वटा पालिकामा वितरण गरिएको हो । राहत वितरण कार्य स्थानीय तह, जिल्ला विपद् व्यवस्थापन समिति र प्रदेश सरकारसँग सहकार्यमा सम्पन्न भएको सेभ द चिल्ड्रेनले जनाएको छ ।

सेभ द चिल्ड्रेन बर्दिबास फिल्ड कार्यालयका प्रमुख धन भुसालले विपदबाट प्रभावित बालबालिका, विपन्न, सीमान्तकृत तथा पिछडिएको समुदायका परिवारलाई लक्षित गरी राहत वितरण गरिएको जानकारी दिए । उनका अनुसार आपतकालीन अवस्थामा तत्काल राहत र पुनःस्थापनामा सहयोग जुटाउने नीतिअन्तर्गत पीडित परिवारको घरदैलोमै पुगेर सहायता पुर्याइएको हो ।

बाढीको प्रकोपले घरबारविहीन बनेका पीडित परिवारले राहत सहयोगले आफूहरूमा फेरि बाँच्ने आशा जगाएको बताएका छन् । एक पीडित महिलाले भनिन्, ‘सबै कुरा बाढीले बगायो, अहिले यो सहयोगले कम्तीमा केही दिनको राहत दिएको छ ।’