सर्लाही, २८ असोज । आगामी फागुन २१ गतेका लागि तोकिएको प्रतिनिधि सभा निर्वाचनलाई लक्षित गर्दै जिल्ला निर्वाचन कार्यालय सर्लाहीले मतदाता नामावली सङ्कलन कार्यलाई तीव्रता दिएको छ । निर्वाचनको मिति घोषणा भएपछि केही समय रोकिएको प्रक्रिया अहिले धमाधम जारी छ ।

राष्ट्रपति रामचन्द्र पौडेलले असोज ८ गते मतदाता नामावलीसम्बन्धी अध्यादेश जारी गरेपछि असोज ९ गतेदेखि देशभर मतदाता नामावली सङ्कलन कार्य सुरु भएको हो । सर्लाहीमा भने असोज १२ गतेदेखि सेवाग्राहीहरूले नाम दर्ता गराउन सुरु गरेका थिए । जिल्ला निर्वाचन अधिकारी शिवनारायण साहका अनुसार सोही दिन १०६ जनाले नाम दर्ता गराएका थिए ।

दशैँ बिदाका कारण केही दिन कार्य प्रभावित भए पनि बिदापछि मतदाता नामावली दर्ता गर्नेको संख्या तीव्र गतिमा बढेको छ । असोज २१ गते १३५ जना, २२ गते ९० जना, २३ गते ११८ जना, २४ गते ९८ जना र २६ गते १७७ जनाले नाम दर्ता गराएको निर्वाचन कार्यालयले जनाएको छ ।

साहका अनुसार कात्तिक ३० गतेसम्म मतदाता नामावलीमा नाम दर्ता गर्न सकिनेछ । उनले भने, ‘१६ वर्ष पूरा भएका र नेपाली नागरिकता प्राप्त गरेका जो कोहीले मतदाता नामावलीमा नाम दर्ता गर्न सक्छन् । तर, फागुन २१ गते हुने निर्वाचनमा मतदान गर्न फागुन २० गतेसम्म १८ वर्ष पूरा गर्नुपर्छ ।’

यो पटक सरकारले नयाँ पुस्तालाई पनि मताधिकार सुनिश्चित गर्न अध्यादेशमार्फत व्यवस्था गरेको छ । यसले आगामी निर्वाचनमा पहिलोपटक मतदान गर्ने जेनजी पुस्ताका युवाहरूलाई सहभागिताको अवसर दिने भएको छ ।

निर्वाचन आयोगले यस पटक जुनसुकै जिल्लाको जिल्ला निर्वाचन कार्यालयमा गएर मतदाता नामावली दर्ता र अद्यावधिक गर्न सकिने सुविधा दिएको छ । तर, तत्कालका लागि जिल्ला निर्वाचन कार्यालयबाट मात्रै दर्ता गर्न सकिने भनिएकाले सर्लाहीमा सदरमुकाम मलङ्गवास्थित कार्यालयबाट मात्र काम भइरहेको छ ।

यस कारण जिल्लाका टाढा–टाढा गाउँका नागरिकलाई सदरमुकामसम्म आउनुपर्ने बाध्यता भएको छ । सेवाग्राहीहरू लामो दूरी पार गरेर मलङ्गवा पुग्नुपर्ने हुँदा असुविधा भएको गुनासो गर्दै आएका छन् ।

जिल्ला निर्वाचन अधिकारी साहले इलाका प्रशासन कार्यालयहरूबाट समेत नामावली सङ्कलन कार्य विस्तार गर्न आयोगसँग अनुरोध गरिएको बताए । तर, आयोगले अहिलेका लागि जिल्लास्थित कार्यालयबाट मात्रै काम गर्ने निर्णय गरेको छ ।

साहले भने, ‘हामीले सुविधा विस्तारका लागि अनुरोध गरिसकेका छौं । तर, आयोगको निर्देशनअनुसार अहिले जिल्ला कार्यालयबाट मात्रै काम भइरहेको छ । भविष्यमा इलाका तहसम्म विस्तार गर्ने सम्भावना खुला छ ।’

सर्लाहीमा अहिले दैनिक सयौँ नागरिक मतदाता नामावलीमा नाम दर्ता गर्न कार्यालय पुगिरहेका छन् । निर्वाचन मिति नजिकिँदै जाँदा मतदाता दर्ता कार्य अझ तीव्र हुने अनुमान गरिएको छ ।