सप्तरी, २८ असोज । तलब र भत्ता नपाएको गुनासो गर्दै अग्नीसाइर कृष्णासवरण गाउँपालिकाका शिक्षक, कर्मचारी र स्वास्थ्यकर्मीहरूले मङ्गलबारदेखि गाउँपालिकाको सबै कार्यालयमा तालाबन्दी गरी धर्ना सुरू गरेका छन् ।

आन्दोलनरत समूहले गाउँपालिका अध्यक्ष र उपाध्यक्षको कार्यकक्ष, विभिन्न शाखा, मुख्य प्रशासनिक गेट र ६ वटै वडा कार्यालयमा तालाबन्दी गरेका छन् । उनीहरूले पालिकाको मूल गेटमै धर्ना बसेका छन् । यसकारण गाउँपालिकाको नियमित सेवा पूर्णरूपमा ठप्प भएको छ ।

तालाबन्दीका कारण प्रशासनिक कामकाज, विद्यालय सञ्चालन र स्वास्थ्य सेवामा प्रत्यक्ष असर परेको छ । सेवाग्राहीहरू आवश्यक कागजात र सिफारिसका लागि गाउँपालिका पुगे पनि कार्यालय बन्द भएकाले निराश भएर फर्किन बाध्य भएका छन् ।

माध्यमिक विद्यालय जण्डोलका प्रधानाध्यापक कामेश्वर मण्डलका अनुसार तलब–भत्ता माग गर्दै पटकपटक गाउँपालिकालाई ध्यानाकर्षण गराइएको थियो । तर, कुनै प्रभावकारी कदम नचालिएकाले बाध्य भएर तालाबन्दी र धर्ना गर्नुपरेको हो ।

‘तलब पाउने सुनिश्चित नभएसम्म आन्दोलन जारी रहनेछ,’ उनले भने, ‘तिहारसम्म पनि भुक्तानी नभए छठपछि विद्यालय, स्वास्थ्य संस्था र कार्यालयहरू पूर्णरूपमा बन्द गरिनेछ ।’

आन्दोलनरत शिक्षक, स्वास्थ्यकर्मी र कर्मचारीहरूले आइतबार गाउँपालिका अध्यक्षलाई ज्ञापनपत्र बुझाउँदै आन्दोलन सुरू गरेका थिए । तीन दिनसम्म कुनै प्रतिक्रिया नआएपछि मङ्गलबारदेखि उनीहरूले तालाबन्दीको निर्णय गरेको जनाइएको छ ।

गाउँपालिकाका अधिकारीहरूले भने आवश्यक स्रोत अभावका कारण केही ढिलाइ भएको र समस्या समाधानका लागि पहल भइरहेको बताएका छन् ।