जनकपुरधाम, २७ असोज । जलवायु परिवर्तन, कृषि प्रणाली र युवाको सहभागितामाथि केन्द्रित विशेष छलफल कार्यक्रम सोमबार जनकपुरधाममा सम्पन्न भएको छ ।

‘जलवायु परिवर्तन, कृषि प्रणाली र कृषिमा युवा सहभागिताका लागि सञ्चारमाध्यमको भूमिका’ विषयक शीर्षकमा आयोजित उक्त कार्यक्रममा सञ्चारकर्मी, कृषि विज्ञ, किसान र युवाको उल्लेखनीय सहभागिता रहेको थियो ।

कार्यक्रमका वक्ताहरूले जलवायु परिवर्तनका कारण कृषि क्षेत्रमा देखिएका गम्भीर चुनौतीहरू र त्यसले उत्पादकत्वमा पार्ने प्रत्यक्ष असरबारे प्रकाश पारे । उनीहरूले कृषि प्रणालीलाई दिगो र अनुकूलनशील बनाउन युवाहरूको सक्रिय सहभागिता र सञ्चारमाध्यमको प्रभावकारी भूमिकाको आवश्यकता औंल्याए ।

कार्यक्रममा बोल्दै कृषि विज्ञहरूले मधेश प्रदेशमा तापक्रम वृद्धि, अनियमित वर्षा र माटो क्षरणका कारण कृषकहरू प्रभावित भएको बताए । उनीहरूले यस्तो अवस्थामा सूचना प्रवाह, प्रविधि हस्तान्तरण र जनचेतनाका माध्यमका रूपमा सञ्चारमाध्यमले महत्वपूर्ण काम गर्न सक्ने बताएका थिए ।

सञ्चारकर्मीहरूले पनि कृषिमा लगानी, अनुसन्धान र नीतिगत प्राथमिकताका विषयमा निरन्तर समाचार, लेख र बहसमार्फत् दिगो कृषि विकासका लागि जनमत निर्माण गर्न सञ्चारको जिम्मेवारी रहेको उल्लेख गरे ।

त्यस अवसरमा युवा प्रतिनिधिहरूले नयाँ पुस्ताले आधुनिक कृषि प्रविधि, जैविक उत्पादन र बजार सञ्जालमा योगदान पुर्याएर कृषि पेशालाई आकर्षक बनाउन सक्ने विश्वास व्यक्त गरे । उनीहरूले राज्यले युवालाई कृषि उद्यममा प्रोत्साहन गर्ने नीति र सहुलियतपूर्ण लगानी वातावरण बनाउनुपर्ने माग पनि गरे ।

कार्यक्रमका सहभागीहरूले जलवायु–अनुकूल कृषि प्रणाली प्रवर्द्धन, सूचना सञ्जाल सुदृढीकरण र युवालाई कृषि–उद्यममा संलग्न गराउने नीति निर्माणका लागि प्रदेश सरकार र सरोकारवालाहरूलाई सुझाव प्रदान गरेका थिए ।