जनकपुरधाम, २७ असोज । गत भदौ २३ र २४ गतेको जेनजी आन्दोलनका क्रममा ध्वस्त बनाइएका सरकारी संरचनाहरूको पुनर्निर्माण जनकपुरधाममा सुरु भएको छ ।

आन्दोलनका क्रममा जलेर नष्ट भएको धनुषा ट्राफिक प्रहरी कार्यालय र विभिन्न प्रहरी बिटहरूको मर्मत तथा जीर्णोद्धार कार्य तीव्र गतिमा अघि बढाइएको जनकपुरधाम उपमहानगरपालिकाले जनाएको छ ।

उपमहानगरपालिकाको सिफारिसमा एक निजी कम्पनी बेगानी ग्रुपले नन्दन घीको प्रयोजनमा झन्डै २५ लाख रुपैयाँको लागतमा पुनर्निर्माणको काम थालेको हो । कम्पनीले हाल धनुषा ट्राफिक प्रहरी कार्यालयमा एल्मुनियमका ५६ वटा झ्याल र ९ वटा ढोका जडानको काम सुरु गरिसकेको बेगानी ग्रुपका प्रतिनिधि प्रवीण साहले जानकारी दिए ।

उनका अनुसार जनकपुरधामका विभिन्न १५ स्थानमा रहेका प्रहरी बिटहरूमा पनि नयाँ निर्माण तथा मर्मत कार्य हुनेछ । कुल परियोजना लागत करिब २५ लाख रुपैयाँ अनुमान गरिएको छ ।

जनकपुरधाम उपमहानगरपालिकाका मेयर मनोज साहले भने, ‘जेनजी आन्दोलनपछि धेरै सरकारी संरचनाहरू जलेर नष्ट भएका थिए । टेण्डर प्रक्रियामार्फत पुनर्निर्माण गर्न समय लाग्ने भएकाले निजी क्षेत्रको स्वैच्छिक सहयोगमा तत्काल मर्मत सुरु गरिएको हो ।’

उनका अनुसार बेगानी ग्रुपले स्वेच्छिक रूपमा पुनर्निर्माणमा सहयोग गर्ने इच्छा व्यक्त गरेपछि उपमहानगरपालिकाले औपचारिक सिफारिस गरेको हो ।

जेनजी आन्दोलनका क्रममा जनकपुरधाममा दर्जनौं सार्वजनिक भवन, प्रहरी चौकी र सवारी साधनमा आगजनी गरिएको थियो । विशेष गरी धनुषा ट्राफिक प्रहरी कार्यालय सबैभन्दा बढी क्षतिग्रस्त स्थानमध्ये एक थियो । भवनसँगै त्यहाँ पार्किङमा रहेको प्रहरी भ्यान पनि पूर्ण रूपमा जलेर नष्ट भएको थियो ।

मर्मत कार्य सुरु भएसँगै ट्राफिक कार्यालयले आफ्नो नियमित सेवा सहज रूपमा सञ्चालन हुने विश्वास व्यक्त गरेको छ ।