जनकपुरधाम, २६ असोज । आगामी फागुन २१ गते हुने प्रतिनिधि सभा निर्वाचन नजिकिँदै जाँदा मधेश प्रदेशमा नयाँ मतदाता नामावली दर्ता अभियान तीव्र बनेको छ । विशेषगरी १८ वर्ष उमेर पुगेका युवाहरू पहिलो पटक मतदान गर्न पाउने उत्साहमा मतदाता दर्ता केन्द्रहरूमा बाक्लो भीड देखिन थालेको छ ।

निर्वाचन आयोगले असोज ९ गते गरेको निर्णयअनुसार प्रदेश निर्वाचन कार्यालय मधेश प्रदेश जनकपुरधामले असोज १० गतेदेखि नयाँ मतदाता नामावली दर्ता गर्ने कार्यक्रम सुरु गरेको हो । अभियान सुरु भएदेखि नै दैनिक सयौँ युवाहरू नागरिकता प्रमाणपत्रसहित कार्यालय पुगेर फारम भर्ने क्रम निरन्तर बढ्दो छ ।

प्रदेश निर्वाचन कार्यालयका कम्प्युटर अपरेटर दिलिप दासका अनुसार हाल दैनिक २०० देखि ३०० जना युवाहरू मतदाता दर्ता फारम भर्न आउँछन् । उनले भने, ‘कार्यालयमा बिहानैदेखि लाइन लाग्छ । अधिकांश नयाँ मतदाताले अनलाइन फारम भरेर प्रत्यक्ष रूपमा कार्यालयमा बुझाउने गरेका छन् ।’

दासका अनुसार कार्यालय परिसरमा नागरिकता प्रमाणपत्र र आवश्यक कागजातका सूचनाहरू टाँस गरिएको छ । त्यसले फारम भर्ने प्रक्रियालाई सहज बनाएको छ ।

यस्तै, कार्यालयका कर्मचारी कृष्ण राउतका अनुसार असोज २६ गते दिउँसो २ बजेसम्ममा १ हजार ३३१ जना नयाँ मतदाताले नाम दर्ता गराइसकेका छन् । तीमध्ये १७१ जना अन्य जिल्लाका र बाँकी धनुषा जिल्लाका छन् । उनले भने, ‘नागरिकता प्राप्त गरेका जो कोहीले पनि अहिले फारम भर्न सक्छन् । र, निर्वाचनको मितिभन्दा एक दिन अघिसम्म १८ वर्ष पूरा हुनेले पनि मतदान गर्न पाउनेछन् ।’

नयाँ मतदाता दर्ता गराउन आएका जनकपुरधामका युवा शिवम साहले पहिलोपटक मतदान गर्ने उत्साह व्यक्त गरे । उनले भने, ‘१८ वर्ष पुगेपछि पहिलोपटक मतदाता नामावलीमा नाम दर्ता गराएँ । अब आफ्नो मत प्रयोग गरेर देशको नेतृत्व रोज्न पाउँदा गर्व लागेको छ ।’

प्रदेश निर्वाचन कार्यालयका प्रमुख लुम्बनाथ पोखरेलले हाल कार्यालयले तीन प्रमुख कार्यलाई प्राथमिकतामा राखेको बताए । नयाँ मतदाता नामावली दर्ता, पुराना नामावलीमा त्रुटि सच्याउने र मतदाता नामावली सराइका काम भइरहेको उनले जानकारी दिए । उनका अनुसार यी तीनवटै काम व्यवस्थित र शान्तिपूर्ण रूपमा सञ्चालन भइरहेका छन् ।

पोखरेलले थपे, ‘मधेश प्रदेशमा मतदाता दर्ताको प्रक्रिया उत्साहजनक रूपमा अगाडि बढेको छ । विशेषगरी युवामा लोकतान्त्रिक सहभागिताप्रतिको चेतना र उत्साह बढ्दो देखिएको छ ।’

जनकपुरधामसहित मधेश प्रदेशका सबै जिल्लामा अहिले निर्वाचनको माहोल क्रमशः चर्किँदै गएको छ । निर्वाचन आयोगले देशभर मतदाता दर्ताको अन्तिम चरणमा प्रविधिमैत्री प्रणालीलाई प्राथमिकता दिँदै अनलाइन दर्ता र डेटा अद्यावधिक गर्ने प्रक्रियालाई सहज बनाएको छ ।

युवाहरूको बढ्दो सहभागिताले यसपालिको निर्वाचनमा नयाँ मतदाताको संख्या उल्लेख्य रूपमा बढ्ने आयोगको अनुमान छ । जनकपुरधामका स्थानीय शिक्षक र समाजसेवीहरूले यसलाई लोकतान्त्रिक अभ्यासको सकारात्मक संकेत भन्दै स्वागत गरेका छन् ।