सिरहा, २५ असोज । सगरमाथा चौधरी आँखा अस्पताल लहानले ‘दियोमुनि अँध्यारो रहनु हुँदैन’ नारासहित सञ्चालन गरेको निःशुल्क आँखा उपचार अभियानअन्तर्गत गत तीन वर्षमा लहान नगरपालिकाका १५ हजारभन्दा बढी नागरिकको आँखा उपचार गरेको जनाएको छ ।

अस्पतालका प्रमुख प्रशासक अभिषेक रोशनका अनुसार अन्धोपन निवारण कार्यक्रम अन्तर्गत दुई हजारभन्दा बढी बिरामीको मोतियाबिन्दुको शल्यक्रिया समेत सफलतापूर्वक सम्पन्न गरिएको छ ।

लहान नगरपालिकाको आर्थिक सहयोगमा सञ्चालन भइरहेको यो अभियानले नगरका सबै २४ वडामा पुगेर निःशुल्क आँखा उपचार सेवा उपलब्ध गराउँदै आएको छ । आर्थिक रूपमा कमजोर वर्गका नागरिकलाई लक्षित गरिएको यो कार्यक्रमले वृद्धदेखि बालबालिकासम्मका आँखाका बिरामीहरूलाई राहत प्रदान गरेको अस्पतालले जनाएको छ ।

हालै सम्पन्न लहान–१५ स्थित धार्मिक–पर्यटकीय स्थलमा आयोजित आँखा शिविरमा तीन दिनभित्र ३०१ जनाको आँखा परीक्षण गरिएको थियो । शिविरका टोली प्रमुख राजकुमार यादवका अनुसार सोमध्ये ९६ जनामा मोतियाबिन्दुको समस्या फेला परेको र तीमध्ये ५० जनाको शल्यक्रिया सकिएको छ । बाँकी ४६ जनाको शल्यक्रिया शनिबार सम्पन्न भएको छ ।

शिविरको लाभ लिएकी ६५ वर्षीया निरसी पासवानले आँखा उपचारपछि जीवनमा नयाँ उज्यालो आएको बताउँदै लहान नगरपालिकाको सहयोगप्रति कृतज्ञता व्यक्त गरिन् ।

उनले भनिन्, ‘गरीब दलितको घरमा संकट आउँदा राहत लिएर आइपुग्ने लहान नगरप्रमुख महेशप्रसाद चौधरीले यसपालि आँखाको उपचार गरेर नयाँ जीवन दिनुभयो, यो मेरो लागि वरदान हो ।’

अस्पतालका अध्यक्ष रविन्द्रलाल चौधरीका अनुसार सगरमाथा चौधरी आँखा अस्पतालले केही वर्षमै नेपाल र भारतका गरी करिब दुई करोड बिरामीको उपचार र २५ लाखभन्दा बढीको आँखा शल्यक्रिया गरेर नयाँ रेकर्ड कायम गर्न लागेको छ ।

उनले भने, ‘नेपालभर करिब ७० लाख आँखा समस्या भएका बिरामीमध्ये एक लाखभन्दा बढीलाई तत्काल शल्यक्रिया आवश्यक छ । लहान अस्पतालले त्यस अभियानमा महत्वपूर्ण भूमिका खेलिरहेको छ ।’

लहान नगरपालिकाको सक्रिय पहल र अस्पतालको समर्पित प्रयाससँगै आँखा उपचारमा मधेश प्रदेशले उदाहरणीय मोड लिएको देखिएको छ ।