हेटौंडा, २५ असोज । पूर्वी मकवानपुरको बकैया गाउँपालिका–५ श्रीपुरमा शनिबार साँझ विद्युत् सर्ट हुँदा लागेको आगलागीले स्थानीय शेरटाव घिसिङको घर पूरै जलेर नष्ट भएको छ ।

प्रहरीका अनुसार साँझ करिब ६ बजेर २० मिनेटतिर घिसिङको घरमा अचानक विद्युत् सर्ट भएर आगो लागेको थियो ।

आगोले टायलको छानो भएको एकतले घर पूर्णरूपमा नष्ट गरेको छ । मकवानपुरका प्रहरी प्रवक्ता प्रहरी नायब उपरीक्षक पुष्कर बोगटीका अनुसार आगलागीपछि प्रहरी र स्थानीयवासीको संयुक्त प्रयासमा करिब ३५ मिनेटको प्रयासपछि मात्र आगो नियन्त्रणमा लिन सकिएको हो ।

आगलागीले घरभित्र रहेको खाद्यान्न, लत्ताकपडा, नगद र अन्य घरेलु सामान सबै जलेर नष्ट भएका छन् । प्रहरीले प्रारम्भिक रूपमा करिब २६ लाख रुपैयाँ बराबरको क्षति भएको अनुमान गरेको छ ।

सौभाग्यवश आगलागीमा मानवीय क्षति भने भएको छैन । प्रहरीले विद्युत् सर्टकै कारण आगलागी भएको प्रारम्भिक अनुसन्धानले देखाएको बताएको छ ।

स्थानीयवासीका अनुसार विद्युत् लाइनमा आएको आकस्मिक स्पार्कपछि आगो छिट्टै फैलिएको थियो । समयमै स्थानीय र प्रहरीको सहयोग नपाएको भए आगो नजिकैका घरहरूमा समेत फैलिन सक्ने सम्भावना थियो ।

प्रहरीले घटनाबारे थप अनुसन्धान भइरहेको जनाएको छ भने स्थानीयहरूलाई घरमा पुराना वा क्षतिग्रस्त विद्युत् तार र उपकरण तत्काल मर्मत गर्न आग्रह गरिएको छ ।