जनकपुरधाम, २२ असोज । मधेश प्रदेशको राजनीतिक समीकरणमा ठूलो परिवर्तन आउने देखिएको छ । बुधबार नेकपा एमालेले मुख्यमन्त्री सतिश कुमार सिंह नेतृत्वको सरकारलाई दिएको समर्थन फिर्ता लिएको छ । पार्टीको आज बसेको बैठकपछि आधिकारिक रुपमा उक्त निर्णय सार्वजनिक गरिएको हो ।

मुख्यमन्त्री सिंहलाई दिएको समर्थन फिर्ता लिँदै एमालेले हालको सरकारसँग अबको सहकार्य सम्भव नरहेको जनाएको छ । मुख्यमन्त्री सिंहको नेतृत्वमा बनेको सरकारले जनअपेक्षा अनुसार काम नगरेको र राजनीतिक नैतिकता हराएको निष्कर्षसहित समर्थन फिर्ता लिएको नेकपा एमालेका एक नेताले बताए ।

एमालेको समर्थन फिर्तासँगै मधेश प्रदेश सरकार अल्पमतमा परेको छ । एमालेजस्तो ठूलो दलको समर्थन गुमेपछि विपक्षी दलहरूलाई सत्ता समीकरण फेरबदल गर्ने अवसर मिलेको छ ।

एमाले नयाँ सरकार गठनको तयारीमा लागेको छ । सम्भावित गठबन्धनका लागि नेपाली कांग्रेस, नेकपा माओवादी केन्द्र र स्वतन्त्र सांसदहरूसँग छलफल अघि बढाइएको बताइएको छ । एमालेका एक नेताले भने, ‘हामी विकल्प निर्माणका लागि सबै लोकतान्त्रिक शक्तिसँग संवाद गर्दैछौं । प्रदेशमा स्थायित्व र सुशासनको लागि नयाँ नेतृत्व आवश्यक छ ।’

यसअघि मधेश प्रदेश सरकारबाट नेपाली कांग्रेसले पनि समर्थन फिर्ता लिइसकेको छ ।