जनकपुरधाम, २१ असोज । धनुषाको गणेशमान चारनाथ नगरपालिका–७ पोर्ताहास्थित पूर्वपश्चिम राजमार्गमा प्रहरीले ठूलो परिमाणको ब्राउन सुगर (खैरो हिरोइन) सहित दुई युवकलाई पक्राउ गरेको छ ।

इलाका प्रहरी कार्यालय ढल्केबरका प्रहरी निरीक्षक जटाशंकर यादवका अनुसार मंगलबार दिउँसो विशेष सूचनाका आधारमा खटिएको प्रहरी टोलीले चेकपोइन्ट खडा गरी राजमार्गमा सवारीसाधन जाँच गर्ने क्रममा उनीहरूलाई नियन्त्रणमा लिएको हो ।

पक्राउ पर्नेमा सिरहाको मिर्चैया नगरपालिका–७ का २४ वर्षीय निरजन यादव र सप्तरीको राजविराज नगरपालिका–९ का २१ वर्षीय रोहन कुमार सिंह रहेका छन् । उनीहरू बा.प्र.०३–००३ प २०८७ नम्बरको मोटरसाइकलमा पूर्वबाट पश्चिमतर्फ जाँदै थिए ।

प्रहरीका अनुसार जाँचका क्रममा मोटरसाइकल रोकिएपछि पछाडिका सवार निरजन यादव भाग्ने प्रयास गर्दै करिब १५० फिट पश्चिमतर्फ कालो प्लास्टिकको पोका झाडीमा फालेका थिए ।

सो पोका संकलन गर्दा त्यसमा ३७.०९ ग्राम खैरो हिरोइन फेला परेको प्रहरीले जनाएको छ । त्यसपछि प्रहरीले दुबै युवालाई नियन्त्रणमा लिएर लागूऔषध नियन्त्रण ऐनअन्तर्गत मुद्दा दर्ता गरेको हो ।

पक्राउ परेका दुवैजनालाई धनुषा जिल्ला अदालतबाट म्याद थप गरी थप अनुसन्धान जारी रहेको प्रहरी निरीक्षक यादवले जानकारी दिए । प्रहरीले अब उनीहरू कहाँबाट लागूऔषध ल्याउँदै थिए र कहाँ लैजान लागेका थिए भन्ने विषयमा अनुसन्धान केन्द्रित गरेको जनाएको छ ।

लागूऔषध नियन्त्रणमा सशक्त अभियान सञ्चालन गर्दै आएको धनुषा प्रहरीले पछिल्लो समय राजमार्ग क्षेत्रमा कडाइका साथ चेकिङ बढाएको जनाएको छ ।

प्रहरीका अनुसार भारतसँग जोडिएको सीमाक्षेत्र हुँदै अवैध रूपमा ब्राउन सुगर र अन्य मादक पदार्थ ओसारपसार हुने क्रम बढेपछि निगरानी कडा पारिएको छ ।