जनकपुरधाम, २१ असोज । मधेश प्रदेश सरकारले मधेशी शहीद प्रतिष्ठानसँगको समन्वयमा मधेश आन्दोलनका क्रममा शहीद भएका परिवारहरूको निःशुल्क स्वास्थ्य बीमा गरेको छ । यो पहल अन्तर्गत हालसम्म १ सय ४० जना शहीदका परिवारको बीमा सम्पन्न गरिएको छ ।

मधेशी प्रतिष्ठानका अध्यक्ष शुभम यादवका अनुसार हालसम्म बीमा प्रक्रिया पूरा भएकामध्ये सबै जिल्लाका शहीद परिवार समेटिएका छन् भने अब बाँकी २४ जनाको बीमा गर्न तयारी भइरहेको छ ।

‘हामीले पहिलो चरणमा शहीद परिवारको निःशुल्क स्वास्थ्य बीमा पूरा गरेका छौँ । अब घाइते र अङ्गभङ्ग भएका आन्दोलनकारीहरूको बीमा पनि क्रमशः विस्तार गर्दैछौँ,’ यादवले भने ।

प्रतिष्ठानले मधेश आन्दोलन र तत्कालीन नेपाल कम्युनिष्ट पार्टी (माओवादी)ले सञ्चालन गरेका आन्दोलनमा घाइते तथा अङ्गभङ्ग भएका करिब एक हजार ६ जनाको स्वास्थ्य बीमा गर्ने लक्ष्य लिएको छ । यसका लागि प्रतिष्ठानले प्रदेश सरकारसँग नीतिगत र आर्थिक सहयोगमा सहकार्य गरिरहेको जनाएको छ ।

प्रदेश सरकारले शहीद परिवारका पाँच जनालाई बीमा शुल्क स्वरूप वार्षिक तीन हजार पाँच सय रुपैयाँ प्रतिष्ठानमार्फत उपलब्ध गराउँदै आएको छ । यसले आर्थिक रूपमा कमजोर परिवारलाई स्वास्थ्य उपचारमा राहत पुगेको प्रतिष्ठानले जनाएको छ ।

अध्यक्ष यादवका अनुसार शहीद परिवारका सदस्यहरूलाई स्वास्थ्य सुरक्षाको दायरामा ल्याउने अभियान अब स्थायी कार्यक्रमका रूपमा अघि बढाइनेछ । उनले भने, ‘मधेश आन्दोलनमा बलिदान दिने शहीद र घाइतेका परिवारलाई राज्यले दीर्घकालीन सुरक्षाको अनुभूति दिलाउनुपर्छ, यही हाम्रो प्रमुख लक्ष्य हो ।’

यसैबीच, प्रदेश सरकारका स्रोतका अनुसार आगामी वर्षदेखि बीमित परिवारका लागि उपचार सुविधालाई अझ विस्तार गरी प्रादेशिक र संघीय अस्पतालहरूमा प्राथमिकताका साथ सेवा प्रदान गरिने तयारी भइरहेको छ ।