जनकपुरधाम, २१ असोज । धनुषाको विदेह नगरपालिका–२ दुहबीमा करेन्ट लागेर एक पुरुषको मृत्यु भएको छ । मृत्यु हुनेमा स्थानीय ५५ वर्षीय हरि पण्डित रहेका छन् ।

जिल्ला प्रहरी कार्यालय धनुषाका अनुसार सोमबार राति करिब १०ः३० बजेतिर सुत्न तयारी गर्दै गर्दा घरको फलामे गेटमा करेन्ट प्रवाह भई पण्डित गम्भीर घाइते भएका थिए । उनलाई तत्कालै जनकपुरधामस्थित प्रादेशिक अस्पताल लगिएको भए पनि चिकित्सकहरूले उपचारको क्रममा मृत घोषणा गरेका थिए ।

प्रहरीको प्रारम्भिक अनुसन्धान अनुसार घरमा बिजुलीको तार काटिँदा करेन्ट फलामे गेटमा प्रवाह भएको कारणले दुर्घटना भएको अनुमान गरिएको छ । मृतक पण्डित जन्मजात अपाङ्ग थिए र हिँडडुलमा कठिनाइ भए पनि गाउँका बालबालिकालाई ट्युसन पढाएर जीविका चलाउँदै आएका मेहनती व्यक्ति थिए ।

स्थानीयवासीहरूले पण्डितलाई सहयोगी र इमानदार व्यक्तिको रूपमा सम्झेका छन् । उनको असामयिक निधनले गाउँभर शोकको माहोल छाएको छ ।

पण्डितका एक छोरा र एक छोरी छन् । छोरा विदेशमा कार्यरत छन् भने छोरीको विवाह भइसकेको छ । श्रीमती भने श्रीमानको मृत्यु भएपछि अचेत बनेकी छन् ।

स्थानीय प्रशासनले घटना विद्युत् सुरक्षा अभावका कारण भएको हुनसक्ने भन्दै जर्जर तार र असुरक्षित कनेक्शन तत्काल मर्मत गर्न सर्वसाधारणलाई आग्रह गरेको छ ।