रौतहट, २१ असोज । रौतहटको सीमावर्ती बौधिमाई नगरपालिका–८ हनुमान चौकमा मङ्गलबार दिउँसो करेन्ट लागेर एक युवकको मृत्यु भएको छ ।

मृत्यु हुनेमा बौधिमाई नगरपालिका–६ पिपरिया टोल निवासी २४ वर्षीय सन्तोष राय यादव रहेका छन् । जिल्ला प्रहरी कार्यालय रौतहटका प्रवक्ता प्रहरी नायब उपरीक्षक राजु कार्कीका अनुसार यादव हनुमान चौकमा मोटरसाइकल ग्यारेज सञ्चालन गर्दै आएका थिए ।

मङ्गलबार दिउँसो करिब सवा ३ बजे उनले ग्यारेजमा मोटरमार्फत पानी तान्ने क्रममा विद्युत् करेन्ट लागेर गम्भीर घाइते भएका थिए । घाइते अवस्थामै उनलाई तत्काल उपचारका लागि बंकुलस्थित चन्द्र ज्योति कान्ति अस्पताल लगिएको थियो । तर, चिकित्सकहरूले उनलाई उपचारको क्रममा मृत घोषणा गरेका थिए ।

घटनापछि प्रहरी चौकी बंकुलबाट खटिएको टोलीले प्रारम्भिक अनुसन्धान सुरु गरेको छ । मृतकको शव पोस्टमार्टमका लागि प्रादेशिक अस्पताल गौर पठाइएको जिल्ला प्रहरीले जनाएको छ ।

स्थानीयवासीका अनुसार ग्यारेजमा प्रयोग हुने मोटरमा अचानक शर्ट सर्किट भएर करेन्ट लागेको अनुमान गरिएको छ । प्रहरीका अनुसार घटनाको विस्तृत विवरणका लागि थप अनुसन्धान जारी छ ।