सर्लाही, २१ असोज । सर्लाही जिल्लाको मलंगवा नगरपालिका–५ भाडसरस्थित लखनदेही खोलामा नुहाउने क्रममा एक युवकको डुबेर मृत्यु भएको छ ।

प्रहरीका अनुसार मंगलबार बिहान करिब ११ः३० बजे स्थानीय चार जना केटाहरु नुहाउनका लागि खोलामा गएका थिए । नुहाउने क्रममा तीमध्ये तीन जना सकुशल बाहिर निस्किए पनि एक जना युवक खोलाको तीव्र बहावमा बगेर बेपत्ता भएका थिए ।

बेपत्ता हुनेमा भाडसरकै विनोद ठाकुरका १८ वर्षीय छोरा ओम ठाकुर रहेका छन् । उनी बेपत्ता भएको जानकारी प्राप्त हुनासाथ प्रहरी चौकी भाडसरका प्रमुख प्रहरी सहायक निरीक्षक जलन्धर प्रसाद यादवको कमाण्डमा रहेको टोली तत्कालै घटनास्थल पुगेको थियो ।

प्रहरी टोली, स्थानीयवासी र उद्धारकर्मीहरूको सहकार्यमा खोजीकार्य जारी राखिएको थियो । करिब एक घण्टापछि दिउँसो करिब १ बजे सोही स्थानमा खोलाको पानीमा तैरिरहेको अवस्थामा ठाकुरको शव फेला परेको प्रहरीले जनाएको छ ।

उनी फेला परेपछि तुरुन्तै प्रादेशिक अस्पताल मलंगवा पठाइएको थियो । अस्पतालमा लगिएको केहीबेरपछि करिब २ः३० बजे चिकित्सकले उनलाई मृत घोषणा गरेका थिए ।

घटनास्थल प्रहरी चौकी भाडसरबाट करिब एक किलोमिटर पश्चिमतर्फ पर्छ । प्रहरीले आवश्यक कानूनी प्रक्रिया पूरा गरी शव पोस्टमार्टमका लागि पठाएको जनाएको छ ।

स्थानीयवासीका अनुसार पछिल्ला केही दिनदेखि निरन्तर वर्षा भइरहेकाले खोलामा पानीको बहाव असामान्य रूपमा बढेको छ । प्रहरीले वर्षायाममा खोलानाला आसपास नुहाउन नजान र सतर्कता अपनाउन सर्वसाधारणलाई आग्रह गरेको छ ।