सिरहा, २० असोज । जनता समाजवादी पार्टी (जसपा) नेपालका अध्यक्ष उपेन्द्र यादवले मुलुकमा प्रत्यक्ष निर्वाचित कार्यकारी प्रमुखको व्यवस्था ल्याउनुपर्ने आवश्यकता रहेको बताएका छन् ।

उनले देशको समृद्धि, राजनीतिक स्थायित्व र जनआकांक्षाको सम्बोधनका लागि अहिलेको प्रणाली पर्याप्त नभएको बताउँदै सङ्घीय लोकतान्त्रिक गणतन्त्रको पुनःसंरचना आवश्यक भएको बताएका हुन् ।

लहानमा सोमबार जसपा जिल्ला समितिद्वारा आयोजित पार्टी प्रवेश तथा शुभकामना आदानप्रदान कार्यक्रममा बोल्दै अध्यक्ष यादवले वर्तमान संसदीय प्रणालीले भ्रष्टाचारलाई संस्थागत गरेको आरोप लगाए । उनका अनुसार अहिलेको प्रणालीमा चुनाव जित्न करोडौँ रुपैयाँ खर्च गर्नुपर्ने बाध्यताले राजनीतिक नेतृत्व जनसेवाभन्दा पनि भ्रष्टाचारमा केन्द्रित भएको छ ।

‘चुनाव जित्न करोडौँ खर्च गर्नुपर्ने बाध्यता छ । त्यसपछि जनप्रतिनिधि जनताको सेवा नभई भ्रष्टाचार गरेर लगानी असुल गर्न लाग्छन्,’ यादवले भने, ‘भ्रष्टाचारको मूल कारण यही प्रणाली हो । त्यसैले यसलाई पूर्ण समानुपातिक बनाउँदै सुधार गर्नुपर्छ ।’

पछिल्ला १० वर्षमा ११ पटक सरकार परिवर्तन हुनु संसदीय व्यवस्थाको असफलताको प्रमाण भएको उल्लेख गर्दै उनले स्थायित्वका लागि कार्यकारी प्रमुखलाई जनताले प्रत्यक्ष रूपमा निर्वाचित गर्ने प्रणाली आवश्यक भएको तर्क गरे ।

‘संसद्ले कानून बनाओस् । तर, कार्यकारी शक्तिसहितको राष्ट्रपतिको चुनाव जनताले प्रत्यक्ष रूपमा गर्न पाउनु पर्छ,’ यादवले भने, ‘त्यसले मात्र स्थायित्व र जवाफदेहिता सुनिश्चित गर्न सक्छ ।’

उनले प्रतिनिधिसभा र राष्ट्रियसभामा जनसंख्याको आधारमा प्रतिनिधित्व हुनुपर्ने माग पनि दोर्होयाए । यादवका अनुसार वर्तमान प्रतिनिधित्व प्रणालीले विशेष वर्ग र शक्तिशाली दलहरूलाई मात्र लाभ पुर्याएको छ ।

‘संविधानले जेनजी पुस्ताले उठाएका आवाज र अपेक्षालाई सम्बोधन गर्न सकेको छैन,’ उनले भने, ‘त्यसैले संविधान पुनर्लेखन गरेर नयाँ पुस्ताको भावना र देशको वर्तमान आवश्यकता अनुरूप बनाउनु अपरिहार्य छ ।’

यसैबीच, जसपा नेपालले संगठन र नीतिगत तहमा युवा पुस्ताको सहभागिता बढाउने घोषणा गरेको छ । पार्टीले हालै सबै मातहतका संरचनामा विशेष परिपत्र पठाउँदै युवा पुस्तालाई पार्टीको नीति, विचार, सिद्धान्त र अभियानसँग जोड्ने कार्य प्रारम्भ गरेको छ ।

जसपाले जेनजी आन्दोलनका क्रममा उठाइएका धेरैजसो मुद्दा पार्टीले पहिलेदेखि नै उठाउँदै आएको नीतिसँग मेल खाने भएकाले युवा पुस्तासँग सहकार्य र समावेशीकरणलाई प्राथमिकता दिइने जनाएको छ ।

‘युवा पुस्तालाई सिर्जनात्मक, राजनीतिक रूपले सचेत र नेतृत्वदायी भूमिकाका लागि तयार पार्ने हाम्रो लक्ष्य हो,’ जसपाको विज्ञप्तिमा भनिएको छ, ‘हामी आन्दोलनका मागहरूलाई संस्थागत गर्दै नयाँ पुस्तासँग मिलेर परिवर्तनको यात्रामा अघि बढ्नेछौं ।’