सर्लाही, २० असोज । सर्लाही जिल्लाको पर्सा गाउँपालिका–१ स्थित हर्दी खोलाको किनारमा सोमबार बिहान एक महिलाको शव फेला परेको छ । बाढी घटेपछि स्थानीय बासिन्दाले खोलाको किनारमा शव देखेपछि प्रहरीलाई जानकारी गराएका थिए ।

जिल्ला प्रहरी कार्यालय सर्लाहीका सूचना अधिकारी प्रहरी नायब उपरीक्षक सरोज राईका अनुसार मृतक महिलाको नाम, थर र वतन अहिलेसम्म खुल्न सकेको छैन । उनका अनुसार महिलाको उमेर अन्दाजी ३० देखि ३५ वर्षबीच रहेको अनुमान गरिएको छ ।

प्रहरीले शवलाई आवश्यक कानूनी प्रक्रिया पूरा गरी पोस्टमार्टमका लागि प्रादेशिक अस्पताल मलंगवा पठाएको जनाएको छ । प्रारम्भिक अनुसन्धानका आधारमा प्रहरीले उक्त महिलाको मृत्यु खोलाले बगाउँदा भएको हुनसक्ने अनुमान गरेको छ ।

पछिल्ला दिनहरूमा सर्लाहीका विभिन्न ठाउँमा अविरल वर्षासँगै खोलानदीहरूमा पानीको बहाव तीव्र बनेको छ । डीएसपी राईले भने, ‘हाल घटनास्थल वरपर बाढीका कारण केही बस्तीहरू डुबानमा परेका छन् । पानी घटेपछि शव फेला परेको हो ।’

प्रहरीले हाल मृतक महिलाको पहिचान खुलाउन सर्भे क्षेत्रका सबै वडा कार्यालयहरू, स्थानीय टोल विकास समिति र आसपासका प्रहरी कार्यालयहरूलाई जानकारी गराएको जनाएको छ ।