रौतहट, २० असोज । रौतहट जिल्लामा लगातारको वर्षापछि बढेको खोलाले जनजीवन प्रभावित पारिरहेको छ । सोमबार दिउँसो नुहाउन गएका एक बालकको खोलाले बगाएर मृत्यु भएको छ भने अर्को घटनामा दुई बालिका बेपत्ता भएका छन् ।

जिल्ला प्रहरी कार्यालय रौतहटका अनुसार राजपुर नगरपालिका–८ बलुवा गोठटोल निवासी गोनवर मियाका १० वर्षीय छोरा अरवाज मियाको खोलाले बगेर मृत्यु भएको हो । दिउँसो करिब २ बजे घर नजिकै रहेको बकैया खोलामा नुहाउन गएका बेला खोलाको तीव्र बहावमा परेर बालक बगेका थिए ।

घटना बारे स्थानीयले जानकारी दिएपछि इलाका प्रहरी कार्यालय राजपुरका प्रहरी वरिष्ठ नायब निरीक्षक राजेन्द्र गिरी र सशस्त्र प्रहरी बल फतुवा बेसका निरीक्षक पूर्णबहादुर तामाङ नेतृत्वको टोली उद्धारका लागि पुगेको थियो । टोलीले करिब ४० मिनेटपछि बालकलाई खोलाबाट फेला पार्न सफल भएको जिल्ला प्रहरी कार्यालयका प्रवक्ता प्रहरी नायब उपरीक्षक राजु कार्कीले जानकारी दिए ।

उनीसहितको टोलीले बालकलाई तत्कालै राजपुर प्राथमिक उपचार केन्द्र फरदहवा पुर्याएको थियो । तर, स्वास्थ्यकर्मीले उनलाई मृत घोषणा गरेका थिए ।

सोमबार दिउँसै रौतहटको देवाही गुनाही नगरपालिका–६ कर्कचटोलमा पनि अर्को दुःखद घटना घटेको छ । प्रहरीका अनुसार करिब साढे २ बजे नुहाउन गएका दुई बालिका अझै बेपत्ता छन् ।

बेपत्ता हुनेमा रामदयाल रामकी १२ वर्षीया छोरी आरती कुमारी र शिवधारी रामकी ११ वर्षीया छोरी अन्तिमाकुमारी रहेका छन् । ती बालिका आफ्नै खेतको भँगालोमा नुहाउन गएका थिए । त्यसपछि उनीहरू हराएका हुन् ।

प्रहरी नायब उपरीक्षक कार्कीका अनुसार बालिकाहरूको खोजी कार्य निरन्तर भइरहेको छ । प्रहरी, सशस्त्र प्रहरी र स्थानीयवासीको संयुक्त टोली परिचालन गरिएको छ ।

रौतहटमा पछिल्ला दिनमा लगातार वर्षा भइरहेको छ । यसले बकैया, झिम, बागमतीजस्ता खोलाहरूको जलस्तर बढाउँदा स्थानीय बस्ती र खेतीबारी प्रभावित बनेका छन् ।

प्रत्येक वर्ष मनसुनमा खोलानदीमा नुहाउने क्रममा डुब्ने वा बग्ने घटनाहरू दोहोरिने गरेकाले स्थानीय प्रशासनले नजिकका खोल्सो र नदीमा जान नहुने चेतावनी जारी गरेको छ ।