जनकपुरधाम, १९ असोज । अविरल वर्षा र बाढीले मधेशका विभिन्न जिल्लामा उत्पन्न गरेको विपद्पूर्ण अवस्थाबीच मुख्यमन्त्री सतिश कुमार सिंहले नागरिकलाई सतर्कता अपनाउन र सुरक्षित रहन आग्रह गरेका छन् ।

मुख्यमन्त्री सिंहले आइतबार एक विज्ञप्ति जारी गर्दै बाढी, डुबान र पहिरोका कारण सिर्जित चुनौतीपूर्ण परिस्थितिमा प्रदेश सरकार, स्थानीय तह र सुरक्षाकर्मीहरू पूर्ण रूपमा सक्रिय रहेको जनाएका छन् ।

मुख्यमन्त्री सिंहले विज्ञप्तिमा भनेका छन्, ‘अविरल वर्षाले मधेशका धेरै जिल्लामा जनजीवन प्रभावित भएको छ । यस्तो कठिन समयमा प्रदेशका सुरक्षा निकाय नागरिकको ज्यान र सम्पत्तिको सुरक्षाका लागि पूर्ण रूपमा प्रतिबद्ध छन् ।’

उनका अनुसार प्रहरी, सशस्त्र प्रहरी र नेपाली सेनाका उद्धार टोलीहरू जोखिमयुक्त क्षेत्रमा खटिएका छन् । डुबानग्रस्त बस्तीहरूमा अस्थायी शिविर र राहत सामग्री वितरणका कार्यहरू पनि निरन्तर भइरहेको उनले जनाएका छन् ।

मुख्यमन्त्री सिंहले स्वास्थ्य सेवा क्षेत्रप्रति विशेष ध्यान दिँदै प्रदेशअन्तर्गतका सबै स्वास्थ्य संस्था र स्वास्थ्यकर्मीहरूलाई सतर्क रहन र जिम्मेवारीपूर्वक सेवा दिन निर्देशन दिएका छन् ।

उनले भने, ‘वर्षा र बाढीका कारण पानीजन्य रोग फैलिन सक्ने सम्भावना उच्च छ । त्यसैले स्वास्थ्यकर्मीहरूले संवेदनशीलता बुझी निःस्वार्थ रूपमा सेवा दिनुपर्ने बेला यही हो ।’

मुख्यमन्त्री सिंहले विपद्को समयमा नागरिकको ज्यान र सम्पत्तिको सुरक्षा नै प्रदेश सरकारको पहिलो प्राथमिकता रहेको स्पष्ट पारे । उनले भने, ‘राहत, उद्धार र सहयोगका कार्यहरू निरन्तर भइरहेका छन् । हाम्रो साझा प्रयासले कुनै पनि अमूल्य मानव जीवनको क्षति नहोस् भन्ने मेरो कामना छ ।’

प्रदेश सरकारका अनुसार हालसम्म धनुषा, सिरहा, सप्तरी, महोत्तरी, रौतहट र पर्साका विभिन्न बस्तीहरूमा बाढी र डुबानको असर परेको छ । सयौँ घर डुबानमा परेका छन् भने कृषियोग्य जमिनमा क्षति पुगेको प्रारम्भिक विवरण आएको छ ।

मुख्यमन्त्री सिंहले प्रदेशवासीहरूलाई एकता र सहयोगको भावना कायम राख्न अपिल गर्दै भनेका छन्, ‘यो कठिन घडीमा प्रदेश सरकार तपाईंको साथमा छ । हामी सबै मिलेर यो विपद् पार गर्नेछौं । एक अर्काको सहयोग र एकताको भावना हाम्रो सबैभन्दा ठूलो शक्ति हो । सुरक्षित रहनुहोस्, सतर्क रहनुहोस् । सुरक्षा, राहत र पुनःस्थापनाका प्रत्येक कदममा प्रदेश सरकार नागरिकसँगै छ ।’

मुख्यमन्त्रीले सबै स्थानीय तहका प्रमुखहरूलाई राहत र उद्धार कार्यमा तत्काल सक्रिय हुन निर्देशन दिएका छन् । उनले स्थानीय प्रशासन र जनप्रतिनिधिहरूलाई प्रभावित क्षेत्रका नागरिकहरूको तत्काल आवश्यकतामा प्राथमिकता दिन आग्रह गरेका छन् ।

मुख्यमन्त्री सिंहले विपद् व्यवस्थापन समिति, गृह मन्त्रालय र भौतिक पूर्वाधार मन्त्रालयलाई सतत समन्वयमा राखेर उद्धार, राहत र पुनःस्थापनाको काम अघि बढाउन निर्देशन दिएका छन् ।