रौतहट, १८ असोज । रौतहट जिल्लामा लगातारको अविरल वर्षा र त्यससँगै परेको चट्याङले ठूलो जनधनको क्षति गरेको छ । शनिबार साँझ कटहरिया नगरपालिका–२ मा परेको चट्याङले दुई किशोरको ज्यान लिएको छ भने जिल्लाका धेरै बस्तीहरू डुबानमा परेका छन् ।

जिल्ला प्रहरी कार्यालय रौतहटका अनुसार साँझ करिब ६ः३० बजे कटहरिया नगरपालिका–२ हथियायीका १६ वर्षीय सेहराज लहरी र १६ वर्षीय नविन यादव चट्याङको चपेटामा परेका थिए । स्थानीयका अनुसार दुवै किशोर वर्षाका बीच खेत नजिकै खेलिरहेका बेला अचानक परेको चट्याङ लागेर घटनास्थलमै बेहोस भएका थिए । उनीहरूलाई स्थानीयले तत्काल स्वास्थ्य संस्थामा पुर्याए पनि चिकित्सकले मृत घोषणा गरेका थिए ।

जिल्ला प्रहरी कार्यालयका प्रवक्ताले बताएअनुसार घटनास्थलको मुचुल्का तयार पारिएको र परिवारलाई कानूनी प्रक्रिया पूरा गरेर शव बुझाइएको छ ।

यसैबीच रौतहटमा निरन्तरको वर्षाले जनजीवन अस्तव्यस्त बनेको छ । बस्ती, बजार र सरकारी कार्यालयहरू समेत डुबानमा परेका छन् । विशेष गरी गौर, गरुडा, महेशपुर र कटहरिया क्षेत्रका अधिकांश घरहरूमा पानी पसेको छ । स्थानीय प्रशासनका अनुसार पछिल्ला १२ घण्टामा मात्र रौतहटको महेशपुरमा ३२६ मिलिमिटर, गौरमा ३०४.४ मिलिमिटर र गरुडामा २७०.४ मिलिमिटर वर्षा भएको मापन गरिएको छ ।

वर्षाका कारण विद्यालयहरू समेत बन्द गरिएको छ भने आवतजावत ठप्पजस्तै छ । सडकहरू जलमग्न हुँदा एम्बुलेन्स र आपतकालीन सेवामा पनि कठिनाइ भइरहेको स्थानीय प्रशासनले जनाएको छ ।

कटहरिया नगरपालिका प्रमुखले भने, ‘डुबान नियन्त्रणका लागि स्थानीय स्वयंसेवक र सुरक्षाकर्मी परिचालन गरिएको छ । धेरै बस्तीमा पानीको सतह बढिरहेको छ, विशेष गरी तटिय क्षेत्रका नागरिकलाई उच्च सतर्कता अपनाउन अनुरोध गरिएको छ ।’

नेपाल रेडक्रस सोसाइटी र स्थानीय टोल विकास समितिहरूले जोखिमपूर्ण क्षेत्रका परिवारलाई अस्थायी शिविरमा सार्ने तयारी गरिरहेका छन् । जिल्ला विपद् व्यवस्थापन समिति रौतहटले निरन्तर निगरानी गर्दै राहत तथा उद्धारका लागि तयारी बढाएको जनाएको छ । तर, पानीको सतह अझै बढ्ने संकेत देखिएकाले रातभर उच्च सतर्कता अपनाउन प्रशासनले आग्रह गरेको छ ।