जनकपुरधाम, १८ असोज । धनुषा जिल्लाको क्षिरेश्वरनाथ नगरपालिका–५ महेन्द्रनगरस्थित दूधमती मिडिया प्रा.लि. का सञ्चालक तथा नेपाल पत्रकार महासंघ धनुषा शाखाका सदस्य अनिल कुशवाहामाथि प्रहरीद्वारा गरिएको दुर्व्यवहार घटनाले स्थानीय सञ्चार क्षेत्रमा तीव्र प्रतिक्रिया उत्पन्न भएको छ ।

नेपाल पत्रकार महासंघ धनुषा शाखाले उक्त घटनाप्रति गम्भीर ध्यानाकर्षण जनाउँदै यसलाई प्रेस स्वतन्त्रता र अभिव्यक्ति स्वतन्त्रतामाथिको प्रत्यक्ष प्रहारको रूपमा वर्णन गरेको छ ।

महासंघका अनुसार असोज १३ गते राति पत्रकार कुशवाहा आफ्नो नियमित रिपोर्टिङ कार्यमा संलग्न रहेका बेला प्रहरीबाट ज्यादती भएको हो ।उनी स्थानीय व्यवसायीको भनाइ सामाजिक सञ्जाल फेसबुकमार्फत सार्वजनिक गरेको केही घण्टामै इलाका प्रहरी कार्यालय सखुवा महेन्द्रनगरका इन्चार्ज प्रहरी निरीक्षक राजाराम यादवले खटाएको प्रहरी टोलीले दूधमती एफएममा प्रवेश गरी पत्रकारमाथि अपमानजनक व्यवहार गरेको बताइएको छ ।

प्रहरीले एफएमको प्रसारण केही समयका लागि अबरुद्ध गराई कुशवाहालाई कार्यालयमै बोलाई गालीगलौज, धम्की र नियन्त्रणमा लिने चेतावनी समेत दिएको थियो ।

पीडित पत्रकार कुशवाहाले नेपाल पत्रकार महासंघलाई दिएको बयानमा भनेका छन्, ‘मैले स्थानीय व्यवसायीको भनाइ जनताको जानकारीका लागि सार्वजनिक गरेको थिएँ । तर, त्यसकै निहुँमा प्रहरीले मलाई डर देखायो, अपमान गर्यो र कार्यस्थलमै धम्की दियो ।’

घटनापछि नेपाल पत्रकार महासंघ धनुषा शाखाले विज्ञप्ति जारी गर्दै प्रहरीको कार्यप्रति आपत्ति जनाएको छ । विज्ञप्तिमा भनिएको छ, ‘कुनै पनि पत्रकारलाई समाचार लेख्न वा अभिव्यक्ति व्यक्त गर्न रोक्नु, डर देखाउनु वा धम्की दिनु लोकतान्त्रिक मूल्य–मान्यताको उल्लङ्घन हो । प्रेस स्वतन्त्रतामाथि हुने यस्तो दमनकारी गतिविधि तत्काल रोकिनुपर्छ ।’

महासंघले घटनाको निष्पक्ष छानबिन गर्न, दोषी प्रहरी अधिकारीलाई कानूनी दायरामा ल्याउन र भविष्यमा यस्ता घटना दोहोरिन नदिन स्पष्ट कार्ययोजना बनाउन सरकार र प्रहरी प्रशासनलाई आग्रह गरेको छ ।

धनुषाका स्थानीय पत्रकारहरूले घटनाको कडा विरोध गर्दै जिल्ला प्रहरी प्रशासनसँग उत्तर मागेका छन् । उनीहरूले घटनाको छानबिनका लागि स्वतन्त्र समिति गठन गर्न र पत्रकारको सुरक्षा सुनिश्चित गर्न माग गरेका छन् ।

जिल्ला प्रहरी कार्यालय धनुषाका प्रवक्ता डीएसपी शैलेन्द्र भट्टले भने, ‘घटनाबारे औपचारिक विवरण प्राप्त भएको छैन, प्राप्त भएपछि आवश्यक छानबिन गरिनेछ ।’