महोत्तरी, १८ असोज । महोत्तरीको पिपरा गाउँपालिका–१ स्थित ढेकाहा बजारमा गएराति अराजक समूहले गरेको आगजनी र तोडफोडका कारण बजार नै ध्वस्त भएको छ । रातको करिब १२ बजेतिर एकाएक आएका युवाको समूहले बजारका पसलका ताला फोड्दै लुटपाट गरेको र त्यसपछि पाँच वटा पसलमा आगजनी तथा तीन पसलमा तोडफोड गरेको स्थानीयवासीले बताएका छन् ।

घटनामा कम्तीमा ५० लाख रुपैयाँ बराबरको सामग्री नष्ट भएको प्रारम्भिक अनुमान गरिएको छ । भवनको क्षतिसहित कुल क्षति करिब डेढ करोड रुपैयाँसम्म पुग्ने बताइन्छ ।

आगजनीपछि बजारभरि धुवाँ र चर्को आवाज फैलिएको थियो । स्थानीयले आगो निभाउने प्रयास गरे पनि सक्ने अवस्था थिएन । बिहान सबेरै मात्र जलेश्वर र मटिहानी नगरपालिकाबाट आएका दुई वटा वारुणयन्त्रले आगो नियन्त्रणमा ल्याउन सकेका थिए ।

आगजनीबाट रुपेश साह र मंसुर कवाडीको किराना पसल, इसा कवाडी र अब्बु कवाडीको पान पसल र महमद उमर राइनको मोटरसाइकल ग्यारेज जलेर खरानी भएको जिल्ला प्रहरी कार्यालय महोत्तरीले जनाएको छ । त्यस्तै, रामवृक्ष यादवको चिया पसल, लतिफ कवाडीको कुखुरा पसल र मजिलिस कवाडीको किराना पसलमा तोडफोड गरिएको छ ।

पीडित व्यापारी रुपेश साहका अनुसार उनको मात्र होलसेल किराना पसलमा करिब १५ लाख रुपैयाँभन्दा बढीको क्षति भएको छ । ‘भाडाको घरमा पसल चलाउँथेँ, सबै सामान सकिए । अब फेरि सुरु गर्ने हिम्मत जुटाउनै गाह्रो छ,’ साहले दुःखेसो पोखे ।

स्थानीयहरूले घटना सुरुमा एकरहिया गाउँमा लागेको दुर्गा मेला र त्यहाँ ल्याइएको भारतीय आरकेष्ट्रासँग सम्बन्धित रहेको बताएका छन् । भारतको साहरघाटबाट झिकाइएका ६ जना नर्तकीसहितको आरकेष्ट्रा हेर्न गएका ढेकाहा र एकरहियाका युवाबीच राति झगडा भएको थियो ।

झगडा चर्किँदै गएर हात हालाहाल भएपछि एक पक्षले अर्को पक्षमाथि प्रतिशोधस्वरूप बजारमा तोडफोड र आगजनी गरेको स्थानीयको दाबी छ । तर, कसले घटना गरायो भन्ने विषयमा दुई पक्षबीच आरोप–प्रत्यारोप चलिरहेको छ ।

एकरहियाका युवामाथि ढेकाहाका युवाले दोष लगाएका छन् भने ढेकाहाका युवाले भने ‘पीडित व्यापारीहरू सबै एकरहियाका हुन्’ भन्दै उल्टै आरोप लगाएका छन् ।

पिपरा गाउँपालिका अध्यक्ष रामजानकी यादव र वडा नं १ का वडाध्यक्ष राजेशकुमार दास दुवैले आरकेष्ट्रा विवादकै कारण घटना भएको स्वीकारे पनि त्यसलाई राजनीतिक मोड दिन खोजिएको बताएका छन् ।

वडाध्यक्ष दासले भने, ‘जेनजी आन्दोलनको रापले सुरक्षाकर्मीको मनोबल घटेको बेला यस्ता अराजक घटना हुनु चिन्ताजनक हो । यसमा राजनीति मिसाउने हो भने स्थिति अझै बिग्रन सक्छ । सत्य तथ्य पत्ता लगाएर दोषीमाथि कारवाही हुनुपर्छ, नत्र यस्ता समूह हौसिन्छन् ।’

जिल्ला प्रहरी कार्यालय महोत्तरीका सूचना अधिकारी डीएसपी शैलेन्द्र भट्टका अनुसार घटनाको मुचुल्का तयार गर्ने काम भइरहेको छ । अहिलेसम्म कुनै व्यक्तिलाई पक्राउ गरिएको छैन । तर, हामीले सूक्ष्म अनुसन्धान थालेका छौं । आगजनीमा संलग्न समूह पहिचान गर्न घटनास्थल वरपरका सिसिटिभी फुटेज र स्थानीय साक्षीहरूको बयान संकलन भइरहेको छ,’ डीएसपी भट्टले बताए ।

प्रहरीले ढेकाहा बजार र वरपरका क्षेत्रमा ठूलो संख्यामा सशस्त्र प्रहरी र नेपाल प्रहरी परिचालन गरेको छ । स्थानीयहरू भने अझै त्रासमा छन् । राति कसैको समूह आउँछ कि भन्ने डरले पसल नखोलेरै बसेका छन् ।

व्यापार संघ, स्थानीय जनप्रतिनिधि र पीडित परिवारले सरकारले तत्काल राहत तथा क्षतिपूर्ति उपलब्ध गराउन माग गरेका छन् । ढेकाहा बजारमा भएको यो आगजनीले मधेशमा चाडपर्वको बेला बढ्दो अराजकता र सीमित सुरक्षा संयन्त्रको प्रभावकारितामाथि पनि गम्भीर प्रश्न उठाएको छ ।