जनकपुरधाम, १८ असोज । आगामी तीन दिन देशभर तीव्र वर्षा हुने पूर्वानुमानपछि राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशभरका लामो दूरीका सवारीसाधन सञ्चालनमा अस्थायी रोक लगाउने निर्णय गरेको छ । प्राधिकरणले जल तथा मौसम विज्ञान विभागको सुझावका आधारमा असोज १८, १९ र २० गतेसम्मका लागि लामो दूरीका सवारीसाधन सञ्चालन बन्द गर्न निर्देश जारी गरेको हो ।

प्राधिकरणका अनुसार कोशी, मधेश, बागमती, गण्डकी र लुम्बिनी प्रदेशका विभिन्न जिल्लामा निरन्तर भारी वर्षा र अति भारी वर्षाको सम्भावना रहेकाले बाढी, पहिरो र डुबानको जोखिम उच्च स्तरमा पुगेको छ । यी जोखिमहरूबाट सम्भावित जनधनको क्षति रोक्नका लागि सावधानीपूर्वक कदम स्वरूप लामो दूरीका तथा काठमाडौं उपत्यकामा भित्रिने र बाहिरिने सवारीसाधन तीन दिनका लागि रोकिएको हो ।

‘जल तथा मौसम विज्ञान विभागको पूर्वानुमान अनुसार १८ देखि २० असोजसम्म देशका पूर्वी र मध्यम क्षेत्रका धेरै स्थानमा मुसलधारे वर्षा हुने सम्भावना छ । यसले विशेष गरी कोशी र मधेश प्रदेशका नदीहरूमा पानीको सतह बढाउने, बाढी र डुबानका जोखिम निम्त्याउने र केही पहाडी क्षेत्रमा पहिरो खस्न सक्ने भएकाले अग्रिम सावधानी अपनाइएको हो,’ प्राधिकरणले जारी गरेको सूचनामा उल्लेख छ ।

प्राधिकरणले सो अवधिमा अत्यावश्यक सेवाबाहेकका कुनै पनि लामो दूरीका सवारीसाधन सञ्चालन नगर्न आग्रह गरेको छ । यसमा निजी, सार्वजनिक, मालवाहक, पर्यटक तथा यात्रीबाहक सबै प्रकारका सवारी साधन समावेश हुने जनाइएको छ ।

त्यसैगरी, सम्बन्धित जिल्लाका प्रमुख जिल्ला अधिकारी र स्थानीय सुरक्षा निकायहरूलाई उक्त निर्देशन कार्यान्वयनमा पूर्ण जिम्मेवारीका साथ खटिन भनिएको छ । उनीहरूले आफ्ना जिल्लाभित्रका मुख्य राजमार्ग, प्रवेश–निर्गमन बिन्दु र संवेदनशील क्षेत्रहरूमा यातायात आवतजावत रोक्न र निरन्तर निगरानी गर्नुपर्ने प्राधिकरणको भनाइ छ ।

‘विपद् जोखिम न्यूनीकरण केवल घटनापछि हुने प्रतिक्रिया नभई अग्रिम तयारी नै यसको मुख्य आधार हो । भारी वर्षा र सम्भावित बाढी–पहिरोबाट नागरिकको जीवन र सम्पत्ति सुरक्षित राख्न यो अस्थायी निर्णय आवश्यक भएको हो,’ प्राधिकरणका प्रवक्ताले भने ।

प्राधिकरणले लामो दूरीका बस सञ्चालक, यातायात व्यवसायी संघसंस्थाहरू, मालवाहक व्यवसायी र पर्यटक गाडी सञ्चालकहरूलाई पनि तीन दिनका लागि सेवा स्थगन गर्न आग्रह गरेको छ । अत्यावश्यक अवस्थाबाहेक कुनै पनि सवारीसाधन चलाए कानुनी कारबाही हुने चेतावनी समेत दिइएको छ ।

त्यस्तै, यात्रुहरूलाई अत्यावश्यक बाहेकका यात्राहरू तत्कालका लागि स्थगित गर्न र सुरक्षित स्थानमा बस्न सुझाव दिइएको छ । जल तथा मौसम विज्ञान विभागका अनुसार आगामी तीन दिन नेपालका पूर्वी र मध्य भागमा लगातार भारी वर्षा हुने देखिएको छ । विभागले विशेष गरी तराईका नदी प्रणालीहरू कोशी, कमला, बागमती र तिनका सहायक नदीहरूमा पानीको सतह तीव्र गतिमा बढ्ने सम्भावना रहेको बताएको छ ।

विभागले पहाडी क्षेत्रमा पहिरो र सडक अवरोधका घटना हुन सक्ने भन्दै सम्बन्धित निकाय र सर्वसाधारणलाई उच्च सतर्कता अपनाउन आग्रह गरेको छ । प्राधिकरणले भने अत्यावश्यक सेवामा पर्ने एम्बुलेन्स, उद्धार कार्यमा खटिएका सवारीसाधन, सुरक्षाकर्मी र खाद्य आपूर्ति सम्बन्धी गाडीहरूलाई भने सञ्चालनको अनुमति रहने जनाएको छ । तर, यी सवारीसाधन पनि जोखिम क्षेत्रको अवस्थालाई ध्यानमा राखी मात्र सञ्चालन गर्न भनिएको छ ।

साथै, प्राधिकरणले नागरिकलाइ नदी, खोल्सामा अनावश्यक आवतजावत नगर्न, पहिरो सम्भावित क्षेत्रमा राति बसोबास नगर्न र स्थानिय प्रशासनका सूचना र निर्देशन पालना गर्न आग्रह गरेको छ ।

गत वर्षको असोज महिनामा पनि निरन्तर वर्षाका कारण देशभरमा ५० भन्दा बढी जनाको मृत्यु र सयौं घरधुरी विस्थापित भएका थिए । बाढी, पहिरो र डुबानका कारण सडक अवरुद्ध, पुल बग्ने र विद्युत् आपूर्ति अवरुद्ध हुने जस्ता घटना बारम्बार दोहोरिएका थिए । यस पटकको निर्णय त्यस्ता घटनाको पुनरावृत्ति रोक्नको लागि अग्रिम तयारीको रूपमा गरिएको प्राधिकरणको भनाइ छ ।