महोत्तरी, १७ असोज । महोत्तरीको सदरमुकाम जलेश्वरमा विजयादशमीको अवसरमा आयोजना गरिएको रावण दहन कार्यक्रम भयावह घटनामा परिणत भएको छ । रावणको पुतलामा अज्ञात कारणले भएको विस्फोटमा पाँच जना घाइते भएका छन् ।

घाइते हुनेमा जलेश्वर नगरपालिका–८ का करिब ४३ वर्षीय पवन पाठक, वडा नं ४ मसूरपट्टीका ९ वर्षीय आनन्द पाठक, जलेश्वर–३ खैरा बस्ने १४ वर्षीय आलम राइन, वडा नं २ का २० वर्षीय सुरज भण्डारी र वडा नं १ का २२ वर्षीय मनीष चौधरी रहेका छन् । घाइतेहरूको टाउको, आँखा र गालामा गम्भीर चोट लागेको प्रहरीले जनाएको छ ।

प्रादेशिक अस्पताल जलेश्वरमा प्रारम्भिक उपचारपछि अधिकांश घाइते घर फर्किएका छन् । तर, ९ वर्षीय आनन्द पाठकको आँखा मुनि गहिरो चोट लागेकाले उनलाई थप उपचारका लागि जनकपुरस्थित आँखा अस्पतालमा रिफर गरिएको छ ।

दुर्गा पूजा समिति शंकर चौकले पछिल्ला केही वर्षदेखि रावण दहन कार्यक्रम गर्दै आएको हो । यस वर्ष भने पहिलेभन्दा फरक ढंगले तीनवटा पुतला (रावण, कुम्भकर्ण र मेघनाथ) दहन गरिएको थियो ।

प्रहरीका अनुसार रावणको पुतला नजिकै उभिएका व्यक्तिहरूमाथि पुतलाबाट निस्किएको कुनै कडा वस्तु वा बारुदीय पदार्थ लागेर घाइते भएका हुन सक्ने प्रारम्भिक अनुमान गरिएको छ । स्थानीयवासीले पुतलामा बमजस्तै बारुदीय पदार्थ प्रयोग गरिएको आशंका व्यक्त गर्दै घटनाको निष्पक्ष छानबिन गर्न माग गरेका छन् ।

घटनापछि इलाका प्रहरी कार्यालय जलेश्वरले विस्फोटको कारणबारे अनुसन्धान सुरु गरेको जनाएको छ । प्रहरीका अनुसार पुतला बनाउने क्रममा प्रयोग गरिएका आतसवाजी वा अन्य बारुदीय सामग्रीकै कारण विस्फोट भएको हुनसक्छ । तर, यसबारे आधिकारिक रिपोर्ट आउन बाँकी छ ।